 | | | ٹرائیڈنٹ ہوٹل کے کئی کمرے اتوار کی رات سے مہمانوں کے لیے بُک ہوں گے |
ممبئی کے حملوں کا نشانہ بننے والے دو ہوٹل، ٹرائیڈینٹ-اوبیروئے اور تاج محل پیلس ہوٹل، جن میں گزشتہ ماہ دہشت گردوں نے دھاوا بول دیا تھا، اتوار کو مہمانوں کے لیے پھر سے کھول دیئے گئے۔ ٹرائیڈینٹ کے مینیجر نے بتایا کہ کہ ہوٹل کھلنے کے بعد اس میں لوگوں کا بہت رش تھا اور یہاں بہت لوگ جمع تھے۔ ہوٹل کے صدر کا کہنا تھا کہ ہوٹل میں ایک بھی نشست خالی نہیں تھی اور لابی اور لاؤنج بھی بھرے ہوئے تھے۔ ٹرائیڈینٹ-اوبیروئے اور تاج محل پیلس ہوٹل بھارتی شہر ممبئی میں ان اہم ترین مقامات پر واقع تھے جہاں دس دہشت گردوں نے ان ہوٹلوں میں موجود افراد کو یرغمال بنا کر رکھا تھا۔ یہ دونوں ہوٹل ممبئی حملوں کے نتیجے میں بری طرح متاثر ہوئے تھے اور ان کی عمارتوں کو بھی شدید نقصان پہنچا تھا۔ممبئی حملوں میں ایک سو ستر افراد ہلاک ہوئے تھے۔ اتوار کو کھلنے والے دونوں ہوٹلوں میں تربیت یافتہ کتے اور مسلح گارڈز پہرہ پر تھے جبکہ مہمانوں کے بیگ چیک کرنے کے لیے خصوصی ایکسرے مشینیں بھی نصب کی گئی تھیں۔ دونوں ہوٹلوں کے باہر سکیورٹی کے سخت ترین انتظامات تھے، لوگوں کے شناختی کارڈ چیک کیئے جا رہے تھے اور مسلح افراد کسی بھی ممکنہ خدشے کے پیشِ نظر تیار کھڑے تھے۔ ٹرائیڈنٹ ہوٹل میں ہر مذہب کو نگاہ میں رکھتے ہوئے ایک دعائیہ تقریب کا بھی اہتمام کیا گیا جس کے بعد رسمی طور پر ہوٹل کو کھولا گیا۔ مولانا سعید اظہر علی نے جو آل انڈیا مسلم پرسنل لا بورڈ کے رکن ہیں، بتایا کہ تقریب کے ساتھ ساتھ ملک میں مذہبی ہم آہنگی کی اپیل بھی کی گئی۔ ’ہم نے قرانی آیات کا حوالہ دیا اور بتایا کہ قرآن تشدد کی ہر شکل کو نا پسند کرتا ہے۔‘ اس ہوٹل میں اکثر آنے والی کریتیکا شرینیوسان نے کہا کہ ’یہاں واپس آنے پر ہماری آنکھوں میں آنسو تھے لیکن یہاں پھر سے آنا بہت اچھا لگ رہا ہے، یہ جگہ پھر سے کھل گئی ہے، علمہ اور انتظامیہ کام میں مصروف ہے اور سب لوگ ہمارا استقبال کر رہے ہیں۔‘ فی الحال کرسمس کے موقع پر دونوں ہوٹلوں کے ان حصوں کو کھولا جا رہا ہے جن کو زیادہ نقصان نہیں پہنچا تھا۔ | 
’آئین مذہبی آزادی کو تحفظ دیتا ہے‘
