ریحانہ بستی والا بی بی سی اردو ڈاٹ کام، ممبئی

	پولیس ذرائع کے مطابق وہ دہشت گرد جنہوں نے ممبئی پر حملہ کیا تھا وہ سب پاکستانی باشندے ہیں

کرائم برانچ ایڈیشنل پولیس کمشنر دیوین بھارتی نے بی بی سی سے گفتگو کے دوران اس بات کی تصدیق کرتے ہوئے کہا کہ پولیس انٹرپول سےمدد طلب کرے گی۔’ہم ابھی ان سے رابطہ قائم کرنے کے مرحلہ میں ہیں‘۔

’سب کا تعلق پاکستان سے‘

کرائم برانچ کے مطابق پولیس وہ تمام ثبوت اکٹھا کر کے سی بی آئی کو دے گی تاکہ سی بی آئی اسے انٹرپول کے حوالے کرے اور انٹرپول اپنی طرف سے بلیک نوٹس جاری کرے گا۔ تاکہ پاکستان اپنے شہریوں کی لاشیں لے جائے۔

نو دہشت گردوں کی لاشیں اس وقت شہر کے سرکاری جے جے ہسپتال کے مردہ گھر میں چار ڈگری فارن ہائیٹ پر رکھی گئی ہے۔ قانون کے مطابق ایک ماہ کے اندر اگر لاش لینے کوئی نہیں آتا ہے تو حکومت ان کی آخری رسومات ادا کرتی ہے۔ لیکن ممبئی کی تمام مسلم تنظیمیں انہیں اپنے یہاں دفن کی مخالفت کر رہی ہیں۔

ممبئی حملوں کے دس میں سے نو دہشت گرد پولیس کارروائی میں ہلاک ہو گئے تھے اور پولیس نے ان میں سے ایک اجمل امیر قصاب کو زندہ پکڑ لیا تھا۔

اجمل نے پولیس کو اپنے مبینہ اقبالی بیان میں کہا تھا کہ وہ پاکستان میں صوبہ پنجاب کے شہر اوکاڑہ میں فرید کوٹ کا رہنے والا ہے اور بقیہ ان کے ساتھیوں کو لشکر طیبہ کے عہدیداران نے ڈیڑھ سال تک تربیت دی تھی۔ اجمل نے پاکستانی ہائی کمیشن کو اردو میں خط لکھ کر مطالبہ کیا ہے کہ وہ ممبئی آ کر اس کے ساتھی ابو اسماعیل کی لاش لے جائیں۔