آنے والے مہینوں میں افراطِ زر کی شرح بارہ سے تیرہ فیصد تک جا سکتی ہے

گزشتہ بارہ ماہ میں تھوک کی قیمتوں میں گیارہ اعشاریہ بیالیس فیصد اضافہ ہوا ہے۔ یہ اضافہ توقع سے زیادہ ہے۔

اس ہفتے کے آغاز پر رِیزرو بینک آف انڈیا نے افراطِ زر کو کنٹرول کرنے کے لیے سود کی شرح آٹھ فیصد سے بڑھا کر ساڑھے آٹھ فیصد کر دی تھی۔

گزشتہ دو ہفتوں میں یہ دوسری بار تھی جب سود کی شرح میں اضافہ کیا گیا۔

حکومت نے خام تیل پر ڈیوٹی کم کرنے کے ساتھ ساتھ چاول دوسرے ملکوں میں بھیجنے پر بھی پابندی عائد کی تھی تاکہ قیمتوں کو کم رکھا جا سکے، لیکن اس کے باوجود خیال ظاہر کیا جا رہا ہے کہ سود کی شرح میں پھر اضافہ ناگزیر ہے۔

آئی سی آئی سی آئی سکیوریٹیز کے اے پرسنا کا کہنا تھا کہ آنے والے مہینوں میں وہ افراطِ زر میں اضافہ دیکھ رہے ہیں اور اس کی شرح بارہ سے تیرہ فیصد تک جا سکتی ہے۔ انہوں نے کہا کہ ریزرو بینک آف انڈیا سال کے دوران سود کی شرح میں اضافہ کرے گا۔