ریاض مسرور بی بی سی اُردو ڈاٹ کام، سرینگر

	پولیس کے مطابق اب تک اٹھائیس لاشیں نکالی جا چکی ہیں

حادثہ کے بعد کئی مسافر لاپتہ ہیں، اور خدشہ ظاہر کیا جارہا ہے کہ وہ دریا میں ڈوب گئے ہیں۔

یہ حادثہ جمعرات کو اُسوقت پیش آیا جب جموں سے کشتواڑ جارہی ایک مسافر بس کشتواڑ سے دس کلومیٹر قبل کاندھری کے مقام پر ساڑھے چار سو فٹ کی اونچائی سے دریائے چناب میں گر گئی۔

جموں میں پولیس کا کہنا ہے کہ اب تک اٹھائیس لاشیں نکالی جا چکی ہیں اور یہ لاشیں ان کے لواحقین کے سپرد کی جارہی ہیں۔

پولیس کے مطابق چھ مسافروں کو زندہ بچا لیا گیا، جن میں سے چار کو جموں کے سرکاری ہسپتال جبکہ دو کو کشتواڑ کے مقامی ہسپتال میں داخل کرایا گيا ہے۔ حادثہ کی وجوہات کا پتہ لگایا جارہا ہے۔

کشتواڑ کشمیر کے پہاڑی خطہ ڈوڈہ کا ایک بالائی ضلع ہے۔ ڈوڈہ کے رہنے والے ایک نوجوان وکیل اور قلم کار فردوس احمد کا کہنا ہے کہ پچھلے چار ماہ کے عرصہ میں یہاں کئی حادثے رونما ہوئے جن میں کم از کم چالیس افراد ہلاک اور پچاس کے قریب زخمی ہوگئے۔

فردوس کا کہنا ہے ’جموں کشتواڑ اور دوسری شاہراہیں تو موت کا راستہ ہیں، کیونکہ یہاں پہاڑوں کے بیچوں بیچ سڑکیں ہیں اور دریا کی جانب سے کوئی پشتہ نہیں بنایا گیا ہے۔‘

دریائے چناب میں لاپتہ افراد کو تلاش کرنے کے لئے پولیس کی بچاؤ ٹیم نے غوطہ خوروں کی خدمات حاصل کی ہیں۔ دریائے چناب جموں صوبے کا مرکزی دریا ہے، جو پانی کے تیز بہاؤ کے لئے مشہور ہے۔ اس دریا کے کنارے بگلہار کے مقام پر حکومت پن بجلی کے اُس منصوبے کی تعمیر ہورہی ہے، جو فی الوقت پاکستان اور ہندوستان کے درمیان متنازعہ ہے۔