سبیر بھومک بی بی سی نیوز ، کولکاتا

	ٹرین میں سوار مسافروں نے دھماکے کی آواز سنی

یہ دھماکہ شمالی آسام کے چونگاجن سٹیشن کے نزدیک راجدھانی ایکسپرس میں رات قریب دو بجے ہوا ہے۔ریلوے کے حکام کا کہنا ہے کہ ’خوش قسمتی سے دھماکہ پارسل والے ڈبے میں ہوا نہ کہ مسافروں کے ڈبے میں‘۔

ابتدائی تفتیش سے پتہ چلتا ہے کہ دھماکہ خیز مواد پٹری پر رکھا گیا تھا۔

آسام پولیس کے خفیہ ادارے کے سربراہ کھاگین سمراہ کے مطابق جس مقام پر دھماکہ ہوا ہے وہاں ایک گہرا گڑھا ہو گیا ہے۔ ان کے مطابق’ بظاہر دھماکہ خیز مواد پٹری پر رکھا تھا لیکن اس سلسلے میں ابھی مزيد تفتیش کی ضرورت ہے‘۔

ریلوے کے ترجمان ترکال رابھا نے بی بی سی کو بتایا کہ دھماکے میں پانچ لوگوں کی موت ہو گئی ہے اور تیرہ زخمی ہو گئے ہیں۔ جبکہ بعض کو معمولی چوٹیں آئی ہیں۔‘

بظاہر دھماکہ خیز مواد پٹری پر رکھا تھا لیکن اس سلسلے میں ابھی مزيد تفتیش کی ضرورت ہے آسام پولیس کے خفیہ ادارے کے سربراہ کھاگین سمراہ

اس سے قبل پیر کو بھی آسام سے دہلی آنے والی ایک ٹرین پڑی سے اتر گئی تھی اور اس واقعہ میں بھی حکام شر پسندی کے اندیشےکو یکسر مسترد نہیں کر رہے ہیں۔

پیر کو ہونے والا حادثہ برہم پترا میل میں نجباڑی کے قریب ہوا تھا اور اس میں ایک شخص ہلاک ہو گیا تھا۔ اس مسافر ٹرین کے ذریعے آسام میں تعینات ہندوستانی فوج کے اہلکار اکثر چھٹیوں کے دوران سفر کرتے ہیں۔