سنتھال کے قدیم باشندوں کی طلبہ یونین ہندوستان کے آئین کے تحت شیڈول قبائل کا درجہ دینے کا مطالبہ کر رہی ہے

جھارکھنڈ کے دارالحکومت رانچی میں عام زندگی بری طرح متاثر ہورہی ہے۔اور کئي مقامات پر مظاہرین نے ٹریفک روک رکھی ہے۔

رانچی سے بی بی سی کے نامہ نگار سلمان راوی کا کہنا ہے کہ ریاست میں ٹرین سروسیز بھی متاثر ہورہی ہیں۔ بند کے پیش نظر سیکورٹی کے سخت انتظامات کیے گیے ہیں اور تشدد کا خدشہ ظاہر کیا جارہا ہے۔

دوسری جانب گوہاٹی سے ملنے والی اطلاعات کے مطابق ریاست آسام میں بھی بند کا اثر دیکھا جارہا ہے۔

گزشتہ سنیچرکو گوہاٹی میں سنتھال نامی قبائل کی طلبہ یونین کی ریلی پرتشدد اور قبائلی اور مقامی باشندوں کے درمیان ہوئی چھڑپ میں ایک شخص ہلاک اور سینکڑوں زخمی ہوگئے تھے۔

سنتھال کے قدیم باشندوں کی طلبہ یونین ہندوستان کے آئین کے تحت شیڈول قبائل کا درجہ دینے کا مطالبہ کر رہی ہے کیونکہ بہار اور جھارکھنڈ ميں اس برادری کو شیڈول قبائل کا درجہ حاصل ہے جس سے انہیں ملازمت اور تعلیم کے میدانوں میں بہتر مواقع فراہم ہوتے ہیں۔

آسام کے سنتھال قبائلی مرکزی ہندوستان کے ان قبائلیوں کی نماندگی کرتے ہیں جنہیں برطانوی دورِ حکومت میں چائے کے باغات میں کام کرنے کے لیے آسام لایا گیا تھا۔