گزشتہ ایک ہفتے میں ریاست میں سڑک حادثے میں ہلاک ہونے والوں کی تعداد انہتر ہوگئی ہے

پولیس کے مطابق یہ حادثہ اس وقت پیش آیا جب ایک بڑے ٹرک اور ایک پک اپ گاڑی کے درمیان ٹکر ہو گئی۔ اس حادثے کے ساتھ گزشتہ ایک ہفتے میں ریاست میں سڑک حادثے میں مرنے والوں کی تعداد انہتر ہوگئی ہے۔

پک اپ گاڑي میں سوار ایک خاندان شادی کی تقریب سے لوٹ رہے تھا کہ نصف شب میں جودھپور کے دیچھو تھانہ علاقے میں تیز رفتار سے آ رہے ٹرک نے اس گاڑی کو ٹکرمار دی۔ ٹکر اس قدر شدید تھی کہ چودہ افراد جائے وقوعہ پر ہی دم توڑ گئے، تین افراد راستے میں جبکہ چار ہسپتال پہنچنے کے بعد ہلاک ہوئے۔

فی الوقت دو افراد کا جودھپور کے سرکاری ہسپتال میں علاج ہو رہا ہے اور ان کی حالت نازک بتائي جاتی ہے۔

مقامی لوگوں کے مطابق مرنے والے میں خاندان کے مکھیا گھیوارم میگھوال بھی شامل ہیں۔ اس حادثے میں ان کے خاندان کا صرف ایک فرد زندہ بچ سکا ہے۔

پولیس نے مرنے والوں کی لاشیں دیچھو تھانے میں رکھوائی ہيں اور ان کی شناخت کی جا رہی ہے۔