گرفتار تینون فوجی غیر ارادتا ہندوستانی سرحد میں داخل ہوئے تھے

ہندوستان کی سرحدی سکیورٹی فورس یعنی بی ایس ایف کے ایک ترجمان کا کہنا ہے کہ’جموں سے تیس کلو میٹر دور آر ایس پورا سیکٹر میں واقع سوچیت گڑھ کے علاقے میں تین پاکستانی فوجیوں کو اتورا کی شام گرفتار کیا گيا۔‘

خبر رساں ایجنسی انڈو ایشین نیوز سروس کے مطابق گرفتار کیے گئے فوجیوں کی شناخت امجد فاروق، ناصر احمد اور شاہد کے طور پر کی گئي ہے۔

ترجمان کے مطابق تینوں جوان فوجی وردی میں نہیں تھے اور ہندوستانی سرحد میں داخل ہوکر عام شہری کی طرح گھوم رہے تھے۔ان فوجیوں کا تعلق چناب رینجر سے بتایا گيا ہے۔

ترجمان کا کہنا ہے’ تینوں گرفتار فوجیوں سے پوچھ گچھ کی گئی اور ابتدائی پوچھ گچھ سے معلوم ہوتا ہےکہ یہ فوجی غیر ارادی طور پر ہندوستانی سرحد میں داخل ہوگئے تھے۔‘

بی ایس ایف نے ان تینوں فوجیوں کے خلاف پولیس سٹیشن میں مقدمہ درج کرادیا ہے۔ ممکنہ طور پر ان فوجیوں سے مزید پوچھ گچھ کی جائے گی۔