تنویر اے صدیقی احمدآباد

	یہ وہ مقام ہے جہاں فرضی پولیس مقابلے کو انجام دیا گیا تھا

یہ درخواستیں تقریباً دو مہینے قبل داخل کی گئی تھی۔

سیشن جج اے جی عریضی نے اپنے فیصلے میں کہا کہ ملزمان اس فرضی پولیس مقابلے میں ملوث پائے گئے ہيں۔ عدالت نے یہ بھی کہا کہ پولیس ریکارڈ کے مطابق سہراب الدین شیخ کو فرضی مقابلے میں مارنے کے بعد ایسا تاثر دیا گيا کہ پولیس نے اپنے دفاع میں گولیاں چلائی تھیں۔

اس مقدمے کے متعلق آخری فیصلہ مکمل سماعت کے بعد سنایا جائے گا۔

دفاعي وکیل کی جانب سے یہ دلیل دیے جانے پر کہ ونجارا اور پانڈین نے کوئی قتل نہيں کیا بلکہ اپنا فرض ادا کیا تھا، عدالت نے کہا کہ اس مرحلہ پر جبکہ ملزمین پر سہراب الدین کے قتل کا الزام لگا ہوا ہے وہ یہ نہيں کہہ سکتے کہ انہوں نے اپنا فرض نبھایا ہے کیوں کہ وہ خود اس معاملے میں فریق کی حیثیت رکھتے ہيں۔

مجاز نہيں  محض اس بات سے کہ مقتول ایک دہشت گرد تھا پولیس اس کو قتل کر دینے کی مجاز نہیں ہو جاتی۔ عدالت

ان پولیس افسران کی یہ دلیل بھی عدالت نے مسترد کر دی کہ وہ اعلی افسر ہیں نیز یہ کہ انہيں ماضی میں بہتر کارکردگی کے مظاہرے کے لیے کئي انعامات اور اعزازت سے نوازا جاچکا ہے۔ جج کا کہنا تھا کہ’یہ صحیح ہے کہ درخواست گزار کو اعزاز و اکرام سے نوازا گيا ہے لیکن یہ چیز بذات خود ان کے جرم کی سنگینی کو کسی طور کم نہيں کرتی‘۔

عدالت نے یہ بات بھی مسترد کردی کہ چونکہ مقتول ایک خطرناک دہشت گرد تھا اس لیے قتل کردیا گیا۔ عدالت کا کہنا تھا کہ محض اس بات سے کہ مقتول ایک دہشت گرد تھا پولیس اس کو قتل کردینے کی مجاز نہیں ہو جاتی۔

ونجارا اور ان کے ساتھی افسران پر الزام ہے کہ نہ صرف انہوں نے سہراب الدین کو آندھراپردیش سے اغواء کر کے اسے فرضی مقابلے میں مار ڈالا بلکہ اس کی بیوی کوثر بی بی کو بھی قتل کر کے اس کی لاش کو نذر آتش کردیا۔

یہ معاملہ اس وقت منظر ‏عام پر آیا تھا جب حکومت گجرات سپریم کورٹ کے سامنے کوثر بی بی کو حاضر کرنے سے قاصر رہی تھی اور اسے یہ اعتراف کرنا پڑا تھا کہ کوثر بی بی کو قتل کر دیا گیا ہے۔ یہ سارا معاملہ پردۂ راز میں ہی رہتا اگر مقتول کا بھائی رباب الدین اپنے بھائي اور اپنے بھابھی کی گمشدگی کا معاملہ عدالت تک نہيں لے گيا ہوتا۔

بعد ازاں اس معاملے کو سیاسی رنگ بھی دیا گيا جس میں حکمراں جماعت بی جے پی نے کانگریس پر الزام لگایا کہ وہ دہشت گردوں کی پشت پناہی کرکے سیاسی فائدہ اٹھانا چاہتی ہے۔ ادھر کانگریس کا کہنا تھا کہ مودی حکومت پولیس مقابلوں کی آڑ میں بےگناہ شہریوں کو موت کے گھاٹ اتار کر خوف و دہشت کا ماحول پیدا کر رہی ہے۔