چھتیس گڑھ کے کئی اضلاع میں ماؤ نواز باغیوں کا اثر ہے

بستر علاقے کے آئی جی آر کے بج نے بی بی سی کو بتایا ہے کہ تئیس پولیس اہلکار اپنی تنخواہیں لے کر واپس ہو جا رہے تھے کہ ان پر گھات لگا کرحملہ کیا گيا ہے۔

حملے کی اطلاع حملے میں زخمی ہونے والے ان پولیس اہلکاروں نے دی ہے جو جائےوقوع سےواپس آنے میں کامیاب ہو گئے۔ پولیس معاملے کی چھان بین کر رہی ہے۔

یہ واقعہ ریاست کے دارالحکومت رائے پور سے تقریبا ساڑھے پانچ سو کلومیٹر کے فاصلے پر ضلع بیجا پور کے جنگلوں میں پیش آیا ہے۔ پولیس کی نفری جب اپنی تنخواہ لیکر جنگل کے راستے سے گزر رہی تھی تو ماؤ نواز باغیوں نے ان پر حملہ کر دیا۔ پولیس کے مطابق یہ واقعہ جمعہ کی سہہ پہر پیش آیا۔

اس نفری سے پانچ پولیس اہلکار بچ نکلنے میں کامیاب ہوگئے اور انہوں نے جب اس کی اطلاع دی تو جائے وقوع کی جانب پولیس کی ایک بڑی تعداد کو بھیجا گیا۔ آئی جی بج کا کہنا تھا کہ کل اٹھارہ پولیس اہلکار لاپتہ ہیں۔

چھتیس گڑھ کے کئی اضلاع میں ماؤ نواز باغیوں کا اثر ہے اور وہاں آئے دن پولیس پر حملے ہوتے رہتے ہیں۔ مبصرین کا کہنا ہے کہ ماؤ نوازوں کے مقابلے میں ریاستی پولیس کی نہ تو تربیت اچھی ہے اور نہ ہی ان کی حکمت عملی، یہی وجہ ہے کہ عام طور ان حملوں میں پولیس کا زیادہ نقصان ہوتا ہے۔

حکومت پر اس حوالے سے بھی تنقید ہوتی رہی ہے کہ وہ ماؤ نواز باغیوں سے نمٹنے میں بری طرح ناکام رہی ہے۔