سپریم کورٹ نے حکومت کو تیس نومبر 2007 تک حتمی فیصلے کے لیے کہا ہے

سپریم کورٹ نے یہ فیصلہ اس عرضی کے جواب ميں دیا ہے جس میں ایسے قیدیوں کو رہا کرنے کی درخواست کی گئی تھی جو بغیر کسی مقدمے کے ملک
کی مختلف جیلوں ميں قید ہیں یا جو اپنی قید کی مدت کاٹ چکے ہیں۔

جموں کشمیر نیشنل پینتھرز پارٹی کے صدر اور پروفیسر بھیم سنگھ کی جانب سے دائر کی گئی درخواست ميں الزام عائد کیا گیا تھا کہ ان لوگوں کو جیل میں قید رکھا گیا لیکن کسی بھی عدالت میں پیش نہیں کیا گیا ہے۔

سپریم کورٹ نے جن چار پاکستانی شہریوں کو رہا کرنے کو کہا ہے ان میں رضا الحق، محمد عثمان شیخ، محمد فاروق راجہ اور قدرت اللہ شامل ہیں۔ سپریم کورٹ نے مرکزی حکومت کو تیس نومبر دو ہزار سات تک اس سلسلے میں آخری فیصلہ کرنے کا حکم دیا ہے۔

سپریم کورٹ کے وکیل اور اس مہم میں شامل بلونت سنگھ بلوریا کا کہنا ہے کہ ’اس سے پاکستانی قیدی ہی نہیں بلکہ ہندوستانی قیدیوں کو بھی فائدہ پہنچے گا‘۔

پبلک سیفٹی ایکٹ کے تحت گرفتار کیے گئے ایسے قیدی ملک کی مختلف جیلوں میں قید ہيں اور کئی قیدی دس سے بھی زیادہ سالوں سے جیلوں میں قید ہیں۔ ہندوستان کے قانون میں پبلک سیفٹی ایکٹ کے تحت اگر کوئی شخص مجرم قرار دیا جاتا ہے تو زیادہ سے زیادہ اسے دو برس کی سزا ہوتی ہے۔