ایم ایس احمد پٹنہ، انڈیا

	بہار کی جیلیں کمائی کے لحاظ سے پہلے نمبر پر ہیں

ریاست کے محکمہ جیل کے ڈپٹی ڈائریکٹر وی سی پی سنگھ نے بی بی سی کو بتایا کہ ’ گزشتہ مالی سال ریاست کی جیلوں میں سزا یافتہ تقریباً اٹھائیس سو قیدیوں کی محنت سے سات کروڑ انیس لاکھ روپے کی آمدنی ہوئی ہے۔ اور اس طرح جیلوں سے آمدنی کے معاملے میں بہار ملک بھر میں دوسرے نمبر پر ہے جبکہ پہلا نمبر مہاراشٹرا کا ہے۔

انہوں نے بتایا کہ ’ہندوستانی پارلیمان پر حملے کے جرم میں افضل گرو کو ملی سزائے موت کے بعد پھانسی کا پھندا مہیا کرنے والی بکسر جیل قیدیوں کی محنت کے لحاظ سے ملک بھر میں اول ہے۔‘

ان کے مطابق مشہور فلم سٹار سنجے دت کی وجہ سے شہرت پانے والی ریاست مہا راشٹر میں واقع یرودا جیل قیدیوں کی محنت سے ہونے والی کمائی کے لحاظ سے دوسرے نمبر پر ہے۔

	جیلوں میں خواتین قیدیوں کی بھی اچھی خاصی تعداد ہے

مسٹر سنگھ بتاتے ہیں کہ اس وقت ریاست کی جیلوں میں چالیس ہزار سے زائد قیدی ہیں جن میں سے چھ ہزار قیدی سزا یافتہ ہیں۔ بقول مسٹر سنگھ ’سزا یافتہ قیدیوں میں عمر رسیدہ قیدی اور مختلف درجات کے دوسرے چار ہزار قیدیوں سے کوئی مشق نہیں کرائی جاتی۔‘

انہوں نے بتایا کہ سن دو ہزار تک قیدیوں لیے مخصوص کپڑا دوسری ریاستوں کی جیلوں سے خریدا جاتا تھا لیکن اب اس کی ضرورت نہیں پڑتی۔ ان جیلوں میں کام کرنے والے قیدیوں کو ہر دن کی محنت کے لحاظ سے آٹھ، دس اور بارہ روپے بطور اجرت دیے جاتے ہیں۔ مسٹر سنگھ نے بتایا کہ قیدیوں کو سال بھر میں قریب سوا کروڑ روپے ادا کیے گئے۔

پھانسی کے پھندوں بنانے کے لیے مشہور بکسر جیل سے بہار کی جیلوں سے ہونے والی آمدنی کا سب سے بڑا حصہ آتا ہے۔ بکسر جیل کے سپرینٹینڈینٹ جے شنکر نے بتایا کہ ان کی جیل میں تیار کردہ کارپیٹ کافی معیاری ہوتے ہیں۔ ان کے مطابق کافی قیدی پاورلومز سے کپڑے بنانے کی صنعت سے وابستہ ہیں۔