بینو جوشی جموں

	تلاشی کے بعد آہستہ آہستہ قیدیوں کو واپس ان کے کمروں میں بھیجا جا رہا ہے (فائل فوٹو)

اتوار کے روز جموں شہر کے نزدیک کوٹ بہلول جیل میں تقریبا تین سو قیدی اپنے کمروں سے باہر نکل کر لوہے کی سلاخیں اور پتھر لیے جیل کی چھت پر چڑھ گئے۔قیدی چھت سے پولیس اہلکاروں پر پتھراؤ کر رہے تھے اور جیل انتظامیہ کے خلاف نعرے بازی کر رہے تھے۔

اس جیل کے بیشتر قیدی مبینہ شدت پسند ہیں اور وہ جیل کے سخت ضوابط کے خلاف احتجاج کر رہے تھے۔

حال ہی میں خفیہ ادارے نے جیل کے اندر موجود شدت پسند قیدی اور ایک جرائم پیشہ قیدی کے پاس سے موبائل کے ’سِم کارڈ‘ برآمد کیے تھے۔

پولیس کے ایک سینئر اہلکار ایس پی وید نے بتایا ہے کہ جب پولیس نے حالات پر قابو پانے کی کوشش کی تو قیدیوں نے ان پر پتھراؤ کرنا شروع کر دیا جس میں بڑی تعداد میں پولیس اہلکار زخمی ہوگئے۔

مسٹر وید کے مطابق ’حالات پر قابو پانے کے لئے پولیس کو آنسو گیس کا استمعال کرنا پڑا اور ہوا میں گولیاں چلانی پڑیں۔‘

مسٹر وید نے بتایا ہے کہ تلاشی کے بعد آہستہ آہستہ قیدیوں کو واپس ان کے کمروں میں بھیجا جا رہا ہے۔