ڈاکٹر محمد حنیف کے ویزے کو منسوخ کر دیا گیا ہے

وزارت خارجہ نے اس حوالے سے آسٹریلیا کے ہائی کمشنر کو طلب کیا ہے اور کہا ہے کہ اسے امید ہے کہ ڈاکٹر حنیف کے ساتھ منصفانہ برتاؤ کیا جائےگا۔

ڈاکٹر محمدحنیف کا تعلق بھارت کے جنوبی شہر بنگلور سے ہے اور وہ ان حملوں کے حوالے سے برطانیہ میں زیرِ حراست کفیل اور سبیل کے چچا زاد بھائی ہیں۔سنیچر کو محمد حنیف پر دہشتگرد تنظیموں کی غیر ارادی مدد کے لیے فرد جرم عائد کی گئی تھی۔

منگل کو آسٹریلیا کے ہائی کمشنر جان میکرتھی کو وزارت خارجہ میں طلب کر کے ان سے کہا گيا ہے کہ بھارت کو ڈاکٹر محمد حنیف کی حراست پر تشویش ہے اور بھارت کو امید ہے کہ ان کے ساتھ قانون کے مطابق بہتر سلوک کیا جائےگا۔

اس سے قبل حکومت نے کہا تھا کہ محمد حنیف کے ساتھ انصاف کے لیے آسٹریلیا میں ہندوستانی سفارت خانہ پورے معاملے پر نظر رکھے ہوئے ہے اور’ڈاکٹر محمد حنیف کے ساتھ کوئی ناانصافی نہیں ہونے دی جائے گی‘۔

اتوار کو ڈاکٹر محمد حنیف کی اہلیہ نے وزیراعظم منموہن سنگھ اور وزیر دفاع اے کے انٹونی سے بھی مدد کی اپیل کی تھی اور خدشہ ظاہر کیا تھا کہ آسٹریلوی پولیس ان کے شوہر کے ساتھ زيادتی کر سکتی ہے۔

خيال رہے کہ پیر کو آسٹریلیا کی ایک عدالت نے ڈاکٹر محمد حنیف کو ضمانت دے دی ہے تاہم حکومت نے انہیں تحویل میں رکھنے کا حکم دیا ہے اور ان کے ویزے کو منسوخ کر دیا ہے۔

آسٹریلیا کی عدالت نے ڈاکٹر محمد حنیف کی ضمانت کی درخواست منظور کرتے ہوئے ان کی رہائی کا حکم دیا تھا لیکن عدالت کا یہ کہنا تھا کہ وہ ہفتے میں تین مرتبہ پولیس کو رپورٹ کیا کریں گے اور ملک سے باہر نہیں جائیں گے۔

عدالت کے فیصلے کے بعد آسٹریلیا کے محکمۂ امیگریشن نے ڈاکٹر حنیف کا ’ورک ویزا‘ اس شبہ پر منسوخ کر دیا تھا کہ مذکورہ ڈاکٹر کا برطانیہ میں دہشت گردی سے تعلق ہے لہذٰا انہیں اب امیگریشن کے قانون کے مطابق تحویل میں لیا جائے گا۔