عمارہ جمالی کلکتہ

	بیس سالہ ملا نے اپریل دو ہزار چار میں شراب کے زیر اثر اپنی بیوی کو طلاق دے دی تھی

مشرقی بنگال کے چوبیس جنوبی پرگنہ ضلع کے باشندے بیس سالہ ملا نے اپریل دو ہزار چار میں شراب کے زیر اثر اپنی بیوی کو طلاق دے دی تھی۔ نشہ اترنے کے بعد اس کو پچھتاوا ہوا اور دوسرے ہی دن اس نے آشتی باگپاڑہ جامع مسجد کے امام مولانا یوسف منڈل کو ساری حقیقت سے آگاہ کیا۔

مولانا منڈل نے ظہیرالدین کو سکینہ سے علیحدہ رہنے کی تلقین کی لیکن ظہیرالدین کے اصرار کو دیکھتے ہوئے کہ وہ سکینہ کو نہيں چھوڑ سکتا مولانا منڈل نے اسے حلالہ کی راہ دکھائی۔

لیکن ظہیرالدین حلالہ کیے بغیرہی بدستور سکینہ کے ساتھ ہی رہتا رہا جس پر اس کے پڑوسیوں نے شدید اعتراض کیا اور اسے دھمکیاں دیں۔

سکینہ کہتی ہیں ’بہت سے پڑوسی ہم لوگوں سے بات نہيں کرتے۔ ہمیں سماجی تقریبات میں مدعو نہيں کیا جاتا اور ہم کو مسلسل دھمکیاں دی جارہی ہیں کہ اس گاؤں میں رہے تو انجام برا ہوگا۔‘

	ظہیرالدین حلالہ کیے بغیرہی بدستور سکینہ کے ساتھ ہی رہتے ہیں

گزشتہ جمعہ کو پولیس نے مہیشیلا تھانہ میں ایک میٹنگ بلائی جس میں ظہیرالدین ملا ، سکینہ او مقامی مسجد کے امام گاؤں کے کچھ معزز افراد اور پولیس کے کچھ اہلکار موجود تھے۔ میٹنگ میں گاؤں والوں نے یقین دہانی کرائی کہ آئندہ ظہیرالدین اور اس کے خاندان کو کسی دھمکی یا تشدد کا سامنا نہيں کرنا پڑے گا۔

مقامی مسجد کو ایک رکن ہاشم شیخ کہتے ہیں ’مجھے یقین ہے کہ ظہیرالدین نے شریعت کی سنگین خلاف ورزی کی ہے۔ ہم اس کو مسلم سماج کا حصہ تسلیم نہیں کریں گے جب تک وہ شریعت پر عمل پیرا ہوجائے اور یہ ہمارا مذہبی معاملہ ہے پولیس کا اس سے کوئی سروکار نہيں ہے۔‘

ظہیرالدین نے میٹنگ کے بعد کہا کہ وہ مسجد میں داخل نہیں ہوں گے اور کسی مسلم سماجی تقریب میں بھی شامل نہيں ہوں گے۔ جنوبی چوبیس پرگنہ کے پولیس چیف سدہناتھ گپتا نے بتایا ’ہم ظہیرالدین اور اس کے خاندان کو پورا تحفظ فراہم کریں گے اور خيال رکھیں گے کہ ان کےخلاف کوئی تشدد نہ ہو۔ گاؤں والوں نے ہمیں یقین دلایا ہے کہ اب ظہیرالدین اور اس کے خاندان کو روزمرہ کی ضرورتیں پوری کرنے کی راہ میں کوئی رکاوٹ نہيں کھڑی ہوگی۔ لیکن ان کے مذہبی بائیکاٹ اور مسجد میں ان کے داخلے پر پابندی کے معاملے میں ہم کچھ نہيں کر سکتے ہیں۔‘

اس دوران کلکتہ کی ٹیپو سلطان مسجد کے مفتی شاہی امام مولانا نورالرحمان برکتی مجددی نے بتایا ’اعصابی مایوسی یا بے خبری کی حالت میں دی گئی طلاق طلاق نہيں ہوتی۔ اگر کسی جاہل نے جو کہ دین اور شریعت کے اصولوں سے بالکل ہی ناواقف ہے بے ارادہ یا غصے میں طلاق دے دی ہے تو اس کی بھی کوئی اہمیت نہيں ہے۔