بینو جوشی جموں، انڈیا

	حادثہ اس وقت پیش آیا جب ڈرائیور نے منی بس پر اپنا قابو کھو دیا

پولیس کا کہنا ہے کہ سنیچر کی دوپہر جموں سرینگر قومی شاہراہ پر ماکیرکوٹ علاقہ کے نزدیک ایک منی بس 200 فٹ نیچے وادی میں گر گئی ہے۔

پولیس کے اہلکاروں نے بتایا کہ اس بس میں سولہ مسافر بیٹھ سکتے تھے اور جب وہ منی بس ’شیطانی نالے‘ میں گری اس وقت اس میں مقامی مسافر ہی سوار تھے۔

حادثہ کی خبر ملنے کے بعد فوج ، پولیس اور مقامی افراد پر مبنی امدادی ٹیم وہاں پہنچ گئی اور آخری خبر ملنے تک ٹیم 13 لاشوں اور دس سے زیادہ زخمیوں کو نکالنے میں کامیاب ہوئی ہے۔

پولیس کا کہنا ہے کہ ابتدائی تفتیش سے پتہ چلتا ہے کہ یہ حادثہ اس وقت پیش آیا جب ڈرائیور نے پیچیدہ پہاڑی راستے سے گزرتے ہوئے منی بس پر اپنا قابو کھو دیا اور بس 200 فٹ نیچے جا گری ۔

حادثہ میں زخمی ہونے والوں کو قریبی علاقہ بنیہال کے ایک سرکاری اسپتال میں داخل کر وا دیا گیا ہے۔