ریحانہ بستی والا بی بی سی اردو ڈاٹ کام، ممبئی

	شو میں ماڈلز نے لباس کے ہم رنگ زیورات بھی زیب تن کیے

پانچ روز تک جاری رہنے والے اس فیشن ویک کی ابتداء مشہور ڈیزائنر وکرم فڈنیس کے ڈیزائن کیے ہوئے ملبوسات سے ہوئی۔

اس سال فیشن شو کی خاصیت یہ ہے کہ اسے گیتا نجلی اور نکشتر ڈائمنڈ کے اشتراک سے منعقد کیا جارہا ہے۔ ماڈلز ملبوسات کی مناسبت سے تیار کردہ دیدہ زیب زیورات پہن کر ریمپ پر جلوہ گر ہوئیں۔

اس سال اِس فیشن ویک میں انڈیا کے نامور ڈیزائنرز نریندر کمار، سباسچی مکھرجی، نیتا للا، وکرم فڈنویس، وینڈیل راڈرکس، ونیت بہل، شہزاد کلیم، نندیتا مہتانی اور ندا محمود کے علاوہ عالمی ڈیزائنر بھی حصہ لے رہے ہیں۔ ان میں سسلے، گیووانی کوگنا اور FCUK کے نام قابل ذکر ہیں۔

فیشن ویک کے پہلے ہی دن اطالوی فیشن برانڈ سسلے اور گیووانی نے سونم دوبال کے ساتھ اپنے ڈیزائن کردہ ملبوسات کا کلیکشن پیش کیا۔ وکرم فڈنیس کے ڈیزائن کیے گئے ملبوسات کے لیے بالی وڈ حسینائیں پری زاد زورابین، منیشا لامبا اورگیتا بسرہ ریمپ پر اتریں۔

سونم دبال کے شو میں انڈین کے ساتھ ایشیائی پہناوے کی جھلکیاں دیکھنے کو ملی۔ ان کا انداز مختلف ممالک جیسے تبت، ازبکستان، شمالی افریقہ اور وسطی ایشیاء میں کافی مقبول ہے۔

	ماڈلز مختلف ڈیزائنرز کے ملبوسات پہن کر جلوہ گر ہوئیں

انڈیا کے ڈیزائنر بھی مختلف ممالک کے فیشن ویک میں حصہ لیتے رہے ہیں لیکن انڈیا کے بازاروں میں غیر ملکی برانڈ نے اپنا سکہ جمانا شروع کر دیا ہے۔ اس لیے اس فیشن ویک میں کئی ڈیزائنرز کو یہ شکایت بھی تھی کہ انڈیا کو غیر ملکی خریدار کے بجائے اپنی مارکیٹ پر زیادہ توجہ دینے کی ضرورت ہے۔

فیشن ویک کے دوران پاکستان میں متوقع فیشن ویک کے چرچے بھی رہے۔ بتایا جاتا ہے کہ یہ فیشن ویک کراچی میں اگست اور ستمبر کے درمیان ہو سکتا ہے جس میں انڈیا سے کچھ ڈیزائنر کو مدعو کیے جانے کی توقع ہے۔

لیکمے فیشن ویک اکتیس مارچ تک ممبئی کے نیشنل سینٹر فار پرفارمنگ آرٹس یا این سی پی اے آڈیٹوریم میں جاری رہے گا۔