نالے سے پولیس نے متعدد انسانی ہڈیاں اور ڈھانچے برآمد کیے تھے

گرفتار ہونے والی سب انسپکٹر کا نام سمرن جیت کور بتایا گیا ہے اور انہیں بدھ کو گرفتار کیا گیا۔

ان پر الزا م ہے کہ قتل کے اس معاملے کے سامنے آنے کے بعد انہوں نے مبینہ طور پر ابتدائی مرحلے ميں علاقے میں بچوں اور عورتوں کے گمشدگی کے حوالے سے مقامی باشندوں کا کیس درج کرنے اور معاملے کی تفتیش میں کوتاہی برتی تھی۔

سی بی آئی کے ترجمان نے بی بی سی سے معطل سب انسپکٹر کی گرفتاری کی تصدیق کی اور کہا’سی بی آئی نے سمرن جیت کور کو نوئیڈا قتل معاملے میں مبینہ طور پر ملوث ہونے کے حوالے سے پوچھ گچھ کے لیےگرفتار کیا ہے‘۔

سی بی آئی کے ترجمان نے مزید کہا’سمرن جیت سے اس حوالے سے بھی پوچھ گچھ ہو گی کہ کہیں کسی مالی فائدہ کے سبب انہوں نے اس قتل معاملے کو دبانے کی کوشش تو نہیں کی‘۔

اس سے پہلے اتر پردیش حکومت نے سخت قدم اٹھاتے ہوئے نوئیڈا کے سینئر پولیس اہلکار کے تبادلہ کے ساتھ ساتھ علاقے کے چھ پولیس اہلکاروں کو برخاست اور چار افسروں کو معطل کر دیا تھا۔ دلچسپ بات یہ ہے کہ اس سے قبل بھی سی بی آئی نے اتر پردیش پولیس کی تفتیش پر سوالات اٹھائے تھے۔

گزشتہ برس انتیس دسمبر کو نوئیڈا میں منندر پندھیر نامی ایک تاجر کے گھر کے سامنے واقع نالے سے پولیس نے سترہ انسانی ہڈیاں اور ڈھانچے برآمد کیے تھے۔

اس حوالے سے اتر پردیش پولیس پر یہ بھی الزام عائد کیا گیا کہ اس نے ابتدائی پندرہ دنوں کی تفتیش میں ملزم کو تلاش کرنے کے بجائے اس نے اصل ثبوت کو مٹانے کی کوشش کی تھی۔

علاقے کے لوگوں کا الزام ہے کہ پولیس نےگمشدگیوں سے متعلق رپورٹ درج کرنے اور ان افراد کی تلاش میں کوتاہی برتی۔ نٹھاری کے باشندوں کا کہنا ہے کہ گزشتہ دو برسوں میں ان کےگاؤں سے تقریبا چالیس بچے اور عورتیں لاپتہ ہو چکے ہیں۔