ریاض مسرور بی بی سی اُردو ڈاٹ کام، سرینگر

	جب لاشیں لواحقین کے حوالے کی گئیں تو وہاں پر کہرام مچ گیا

فوج نے بھی اپنے طور پر انکوائری کا حکم دیاہے لیکن علاقے میں ابھی تک خوف کا عالم ہے اور مقامی لوگوں کو انصاف کی بہت کم اُمید ہے۔ ہلاک ہونے والے شہریوں کی لاشیں جب ان کے لواحقین کے سپرد کی گئیں تو وہاں پر کہرام مچ گیا۔

مقامی شہری عبدالحمید کا کہنا ہے کہ گزشتہ روز فوج نے ترال کی ایک بستی کا محاصرہ کیا اور اچانک شہریوں پر گولیاں چلانا شروع کر دیں جس کے نتیجے میں جہانگیر اور غلام محمد نامی دو شہری موقع پر ہی ہلاک ہوگئے۔

	ترال کے شہریوں نے زبردست احتجاج کے بعد پولیس کو مقدمہ درج کرنے پر مجبور کیا

اس کے بعد بستی کو چوبیس گھنٹے تک محاصرے میں رکھا گیا۔ مقامی لوگوں کا کہنا ہے کہ مسجد کے امام بلال احمد گنائی سمیت کئی شہریوں کو گرفتار کیا گیا ہے۔

شہریوں کی ہلاکت اور گرفتاریوں کے خلاف علاقے میں خواتین نے مظاہرے کئے۔ فاطمہ نامی ایک مقامی خاتون نے بتایا کہ پچھلے کئی ماہ سے ترال علاقے میں اس نوعیت کے واقعات جاری ہیں۔ ان کا کہنا تھا کہ ’حکومت تحقیقات کا حکم دیتی ہے، ہم انتظار کرتے رہتے ہیں اور اسی دوران کوئی دوسرا واقعہ ہو جاتا ہے‘۔

جنوبی کشمیر کے ڈی آئی جی ایچ کے لوہیا نے بی بی سی کو بتایا کہ انہوں نے ازخود فوج کے خلاف دوہرے قتل کا کیس رجسٹر کیا ہے۔

	’پچھلے کئی ماہ سے ترال علاقے میں اس نوعیت کے واقعات جاری ہیں‘

فوجی ترجمان کرنل ماتھُر کا کہنا ہے کہ فوج نے اس واقعہ کے حوالے تحقیقات کا حکم دیا ہے۔ انہوں نے یقین دہانی کرائی کہ قصور واروں کو سزا دی جائے گی۔

واضح رہے کہ فروری کے اوائل میں بھی ترال کی مسجد میں نماز پڑھتے ہوئے ایک شہری کو فوج نے ہلاک کر دیا تھا۔ اس ہلاکت کے بارے میں مقامی لوگوں کا کہنا تھا کہ فوج نے مقتول کو حراست کے دوران ازیتیں دے کر ہلاک کیا جبکہ فوج نے دعویٰ کیا تھا کہ جنجگوؤں کی طرف سے حملے کے بعد فائرنگ کے تبادلے میں وہ شہری مارا گیا۔