سشیل جھا بی بی سی پانی پت

	ناصر کی بیوی ہمّت کرکے سامعہ کے والد کو کراچی فون ملاتی ہیں

اتر پردیش کے رام پور شہر سے پانی پت پہنچنے والے ناصر علی خان یہ کہتے کہتے بچّوں کی طرح رو پڑے۔ جہاں آرا کی لاش کی شناخت ہو گئی ہے۔ آنسوں ہیں کہ رکنے کا نام ہی نہیں لے رہے۔

ناصر کہتے ہیں’ہم نے کراچی فون کیا ہے اور پوچھا ہے کہ لاش کا کیا کریں۔ وہ کہيں گے تو پاکستان لے جائیں گے نہیں تو انہیں رام پور میں ہی دفن کردیا جائے گا‘۔

ناصر علی خان کی سگی بہن جہاں آراء اپنی بیٹی کا جہیز خریدنے ہندوستان آئی تھیں اور سارا سامان خرید کر واپس پاکستان جا رہی تھیں لیکن نہ تو وہ پہنچیں اور نہ ہی سامعہ کا جہیز۔

وہ جہیز اور ساتھ ہی اس خاندان کی تمام خوشیاں سمجھوتہ ایکسپریس کے دھماکوں کی نذر ہوگئیں۔

ناصر کی بیوی ہمّت کرکے لاش کی شناخت کے بعد سامعہ کے والد مبارک علی سے بات کرنے کے لیے کراچی فون ملاتی ہیں۔

	ہلاک ہونے والی جہاں آراء کے بھائی ناصر علی خان

اس اندوہناک خبر سے توجہ ہٹانے کے لیے وہ بات کا موضوع بدل دیتی ہیں۔ ناصر کی بیوی فون پر سامعہ سے کہتی ہیں’تمہارے لیے ہم نے قیمتی سوٹ بھیجے تھے، عروج کے لیے بھی زیور تھے۔ گھر کے پردے تھے۔ جہیز کے پردے تھے۔ کپڑے وغیرہ سب کچھ تھے۔ تم پریشان نہ ہونا سب کا خیال رکھنا‘۔

کسی کو نہیں پتہ کہ دوسری طرف سے سامعہ نے کیا کہا یا پھر وہ کچھ کہہ بھی پائی کہ نہیں ۔ جہیز تو ایک طرف، اب اس کی ماں بھی اب کبھی اس کے پاس نہیں پہنچ سکیں گی۔