ٹاٹا گروپ کے چیئرمین رتن ٹاٹا یورپی سٹیل کمپنی کورس کی نیلامی جیتنے کا اعلان کر رہے ہیں

قبل ازیں ٹاٹا نے بولی کے حتمی مرحلے میں برازیل کی کمپنی سی ایس این کو نیلامی سے باہر کر دیا تھا۔ اس کےساتھ ہی ٹاٹا کے لیے کورس حاصل کرنے کا راستہ صاف ہو گیا تھا۔

برطانیہ کے ٹیک اوور پینل نے بتایا ہے کہ نیلامی کے حتمی مرحلے میں ٹاٹا نے 608 پینس فی حصص کی بولی دی تھی یعنی کورس کی بحیثیت مجموعی بولی تیرہ اعشاریہ سات بلین ڈالر لگائی گئی تھی جبکہ ٹاٹا کی حریف کمپنی سی ایس این نے603 پینس فی شئیر بولی لگائی تھی۔

پوری دنیا میں کورس گروپ کے 300, 47 ملازمین کام کرتے ہیں جن میں چوبیس ہزار برطانیہ میں قائم سٹیل کے کارخانوں میں ملازم ہیں۔

بولی جیتنے سے قبل ممبئی سےتعلق رکھنے والی ٹاٹا کمپنی نے کہا تھا کہ اگر وہ بولی جیت جاتی ہے تو وہ ملازمتوں میں کٹوتی نہیں کرے گی لیکن مبصرین کے خیال میں ایسا ممکن نہیں ہے۔ ٹاٹا نے کورس کی قیمت فی شیئر 500 پینس اور سی ایس این نے 515 پینس لگائی تھی اور دونوں کا کہنا تھا کہ یہ صحیح قیمت ہے۔

ٹاٹا کمپنی کی کامیابی پر ملک کے فیڈریشن آف انڈین چیمبرز آف کامرس کے جنرل سکریٹی امت مترا کا کہنا ہے کہ یہ ہندوستان کی اقتصادی شعبے کی طاقت کا ایک نمونہ ہے۔ بین الاقوامی بازار میں ہندوستان کے لیے اعتماد کی فضا پیدا ہو رہی ہے اور یہ ملک کی ایک اور فتح ہے۔

انہوں نے مزید کہا کہ ہندوستان جلد ہی دنیا کی تیسری سب سے بڑی معیشت کے طور پر ابھرنے والا ہے اور یہ معاہدہ اس کی ایک جھلک ہے۔

اقتصادی ماہر آلوک پورانک نے اس معاہدے کو ایک بڑی کامیابی بتاتے ہوئے کہا کہ سب سے پہلے اس معاہدے کی وجہ سے یورپی بازار میں داخلہ ممکن ہو سکے گا اور دوسری بات یہ کہ ٹاٹا کو کم لاگت میں سٹیل پیدا کرنے کا ہنر معلوم ہے۔ اگر انہیں یورپ کے بازار میں اچھی قیمتیں حاصل ہو جاتی ہے تو اس کا فائدہ انہیں ملے گا جن کے پاس کورس اور ٹاٹا دونوں کمپنیوں کے حصص موجود ہیں۔