عمر فاروق بی بی سی اردو ڈاٹ کام ، حیدرآباد

	پولیس کو پہلی کامیابی ایک دوہرے قتل کے معاملے کی تفتیش کے دوران ہوئی

گزشتہ ایک سال کے دوران اس علاقے میں قتل کے کئی واقعات پیش آئے ہیں۔

سائبر آباد کے پولیس کمشنر پربھاکر ریڈی نے پیر کے روز ان تینوں ملزمان کو ایک پریس کانفرنس کے دوران میڈیا کے سامنے پیش کیا۔

مسٹر ریڈی نے نامہ نگاروں کو بتایا کہ ملزمان نے نو افراد کو قتل کرنے کا اعتراف کیا ہے۔ انہوں نے بتایا کہ’ ان کا قتل کرنے کا طریقہ ایک جیسا تھا۔ یہ لوگ پتھر سے سر کچل کر قتل کرتے تھے‘۔

پولیس کمشنر نے بتایا کہ یہ ملزم معمولی رقم کے حصول کے لیے لوگوں کو قتل کر دیتے تھے۔ انہوں نے بتایا کہ قتل کی ان وارداتوں میں جنسی استحصال کا پہلو شامل نہیں ہے اور صرف ایک عورت کو قتل کرنے سے پہلے ان لوگوں نے اسے’ریپ‘ کیا تھا۔

مسٹر ریڈی نے میڈیا میں آنے والی ان خبروں کو مسترد کیا جن میں کہا جا رہا تھا کہ ملزمان ہم جنس پرست تھے۔ انہوں نے کہا کہ ملزمان منشیات کے عادی ہیں اور معمولی رقم کے لیے معصوموں کا قتل کرتے تھے۔

پربھارکر ریڈی نے بتایا کہ اس معاملے میں پولیس کو پہلی کامیابی ایک دوہرے قتل کے معاملے کی تفتیش کے دوران ہوئی ہے۔

یاد رہے کہ گزشتہ ہفتے پولیس کو صنعتی علاقے کاٹیےدان میں سر کچلی ہوئی دو لاشیں ملی تھیں۔ ان کے علاوہ ہلاک ہونے والوں میں ایک طوائف بھی شامل ہے۔

یہ واقعہ ایک ایسے وقت سامنے آیا ہے جب دلی کے نواحی شہر نوئیڈا کے نٹھاری گاؤں میں سترہ بچوں اور عورتوں کے اغوا، ریپ اور قتل کا واقعہ سرخیوں میں ہے۔