ریاض مسرور بی بی سی اُردو ڈاٹ کام، سرینگر

	میرواعظ مولوی عمرفاروق نے دلی کو اپنا نمائندہ بھیجا ہے

وزیر اعلیٰ غلام نبی آزاد اور کئی علیٰحدگی پسندرہنماوں نے وزیراعظم منموہن سنگھ اور کشمیر پر بھارتی مذاکرات کار نریندر ناتھ ووہرا کے ساتھ ملاقات کی ہے۔

مسٹر آزاد کے قریبی ساتھی اور مقامی کانگریس لیڈر عبدالغنی وکیل نے بی بی سی کو بتایا کہ مسٹر آزاد نے وزیر اعظم کو جموں کشمیر کے منقسم حصوں کے درمیان سیاحت اور تجارت کے شعبوں میں مشترکہ نظام کے علاوہ فوجی انخلا کی قابل عمل صورتوں سے آگاہ کیاہے۔

اس دوران سخت گیر اور اعتدال پسند علیٰحدگی پسندوں نے بھی پچھلے دو روز سے دلّی میں ڈیرہ جما رکھاہے۔ حریت کانفرنس کے دو سابق سربراہ سید علی شاہ گیلانی اور پروفیسر عبدالغنی بٹ نے بھارتی دورے پر آنے والے یورپی یونین کے وفد کے ساتھ ملاقاتیں کی ہیں۔

حریت کانفرنس کے ایک گروپ کے سربراہ میرواعظ عمر فاروق نے بی بی سی کو بتایا کہ ان کا نمائندہ کشمیر کے متعلق یورپی یونین کی رپورٹ میں بعض خامیوں کی نشاندہی کرنے کے لیے دلی گیا ہوا ہے۔

حریت کے اندرونی ذرائع نے بتایا کہ پروفیسر غنی کی سربراہی میں حریت کے وفد نےمسٹر ووہرا کے ساتھ دو ملاقاتیں کیں ہیں۔ ان ملاقاتوں میں حریت کانفرنس کے دورہ پاکستان اور نئی دلّی کے ساتھ مذاکرات کے عمل کی بحالی پر غوروخوض ہوا۔

مسٹر فاروق نے ووہرا اور حریت وفد کے درمیان ملاقات کی تردید یا تصدیق نہ کرتے ہوئے بتایا ک ’ ہم تو سہ رُخی مذاکرات کے حامی ہیں۔‘

	پروفیسر بٹ بھارتی اہل کارون سے ملاقات کر رہے ہیں

میرواعظ عمر فاروق کا کہنا ہے’ ہم وہاں جنرل مشرف کے ساتھ ان کے تازہ چار نکاتی فارمولہ پر گفت و شنید کریں گے۔‘

ان کا کہنا تھا کہ وہ حکومت، اپوزیشن اور کشمیر میں سرگرم مسلح جنگجوؤں کی قیادت کے ساتھ بھی تبادلہ خیال کریں گے۔

مسٹر فاروق کے مطابق حریت کا یہ وفد پاکستان کے لیے سترہ یا اٹھارہ جنوری کو روانہ ہوگا۔

دریں اثنا حریت سے باہر سرگرم علیٰحدگی پسند گروہ بھی متحرک ہوگئے ہیں۔ حریت کانفرنس سے علیٰحدہ ہونے والی پیپلز کانفرنس کے سربراہ سجاد غنی لون نے 'قابل حصول وطنیت‘ کے عنوان سے دو سو اڑسٹھ صفحات پر مشتمل ایک روڈ میپ جاری کردیا ہے۔

اس میں جموں کشمیر کے دونوں حصوں کو ایک دولت مشترکہ بناکر پورے خطے کی حاکمیت میں ہندوستان اور پاکستان کو برابر کا شریک بنایا جانا تجویز کیا گیا ہے۔
مسٹر لون نے بی بی سی کو بتایا کہ یہ روڈمیپ ہندوستان اور پاکستان کے سربراہوں کو پیش کیا جائے گا۔

پرنب مکھرجی پاکستان میں قیام کے دوران جنرل مشرف کو اپریل میں مجوزہ سارک کانفرنس میں شرکت کی دعوت دیں گے اور اپنے پاکستانی ہم منصب خورشید قصوری کے ساتھ ملاقات کے دوران مربوط مذاکرات کے تیسرے دور کی تیاری کا جائزہ لیں گے۔

گزشتہ برس نیشنل کانفرنس کے عمر عبداللہ سمیت متعدد ہندنواز لیڈروں کے دورہ پاکستان کے بعد ان کے لہجہ میں نمایاں تبدیلی رونما ہوئی ہے۔