صدام کی پھانسی پر ہندوستانی عوام میں سخت ردعمل پایا جاتا ہے (فائل فوٹو)

وزارتِ خارجہ کے دفتر سے جاری ہونے والے ایک بیان میں کہا گیا ہے ’ ہم نے پہلے بھی یہ امید ظاہر کی تھی کہ صدام کو پھانسی نہ دی جائے لیکن افسوس ہے کہ انہیں پھانسی دے دی گئی ہے۔ ہم امید کرتے ہیں کہ اس بدقسمت واقعے کے سبب عراق میں امن کا عمل متاثر نہ ہو‘۔

حکمران جماعت کانگریس کے رہنما جناردھن دیودی کا کہنا ہے’ جو کچھ ہوا وہ بہت برا ہوا۔ ہم نے پہلے بھی کہا تھا کہ صدام کی سزا کا فیصلہ صحیح طریقے سے ہونا چاہیے۔ یہ فاتح کی کارروائی نہیں لگنی چاہیے۔ لیکن ہوا وہی جس طرح سے سماعت ہوئی اور فیصلہ سنایا گیا۔ پھانسی دینے میں جلد بازی کی گئی۔ اس سے اس پوری قانونی کارروائی پر ایک سوال اٹھتا ہے‘۔

کمیونسٹ پارٹی آف انڈیا کے سینئر لیڈر نلوتپل باسو کا کہنا ہے’ جس جلد بازی میں صدام حسین کو پھانسی دی گئی ہے، اس سے صاف پتہ چلتا ہے کہ امریکہ اور اس کے حمایتوں کے سامنے عراق کی حکومت بے بس ہے‘۔

جو کچھ ہوا وہ بہت برا ہوا۔ ہم نے پہلے بھی کہا تھا کہ صدام کی سزا کا فیصلہ صحیح طریقے سے ہونا چاہیے۔ یہ فاتح کی کارروائی نہیں لگنی چاہیے۔ لیکن ہوا وہی جس طرح سے سماعت ہوئی اور فیصلہ سنایا گیا۔ پھانسی دینے میں جلد بازی کی گئی۔ اس سے اس پوری قانونی کارروائی پر ایک سوال اٹھتا ہے کانگریس کے رہنما جناردھن دیودی

سینئر صحافی اور انسانی حقوق کے لیے کام کرنے والی کارکن تیستا سیتلواد کا کہنا ہے کہ صدام حسین کو پھانسی کی سزا دے کر امریکہ نے اپنے دوغلے رویے کا پوری دنیا کے سامنے اظہار کر دیا۔ افسوس کی بات ہے کہ دنیا کے سب سے بڑے دو جمہوری ممالک ہندوستان اور امریکہ میں آج بھی پھانسی کی سزا دی جاتی ہے۔ امریکہ کی دوسری دوغلی پالیسی کا نمونہ دنیا کے سامنے ہے جب وہ ایک طرف فلسطین کے خلاف اسرائیل کی مدد کرتا ہے اور دوسری جانب مسلم ممالک میں جارحانہ انداز میں عمل دخل کے ذریعہ وہاں لوگوں کا سکون چین برباد کرتا ہے۔ صدام کو پھانسی دیے جانے کا مطلب ہے کہ امریکہ مسلم ممالک پر اپنی برتری ثابت کرنے اور انہیں یہ پیغام دینے کی کوشش کر رہا ہے کہ وہ انہیں اسی طرح خاموش کر سکتا ہے۔

بیشتر افراد کاخیال ہے کہ صدام حسین کو پھانسی دیے جانے کا فیصلہ صحیح نہیں ہے کیونکہ اس سے عراق میں حالات مزید خراب ہوسکتے ہیں۔

دلی کی ایک دوکان کے مالک نریش کمار کا کہنا ہے کہ صدام حسین کی پھانسی کے پیچھے امریکہ کا ہی ہاتھ ہے اور وہ ہی یہ سب کروا رہا ہے۔ اگر دیکھا جائے تو اسلامی ممالک میں ایسے حالات تو پیش آتے ہی رہتے ہیں اور جو کچھ صدام حسین نے کیا اس کے لیے پھانسی کی سزا مناسب نہیں تھی۔

کشمیری سامان کے تاجر سجاد بٹ کا کہنا ہے ’صدام حسین ایک رہنما تھے اور انہيں پھانسی دینے کا فیصلہ بالکل غلط ہے۔ امریکہ نے پورا ڈرامہ تیار کیا تھا۔