سوبیر بھومک کولکاتہ

	قتل کی تحقیقات اب سی بی آئی کرے گی: وزیراعلیٰ

یہ معاملہ سنگور قصبے میں ٹاٹا کمپنی کو الاٹ کی گئی زرعی زمین کے نزدیک پیش آیا تھا۔

سنگور کے باشندوں کا کہنا ہے کہ تپوشی ملک نامی غیر شادی شدہ عورت کی عصمت دری کے بعد بائیں بازو کے کارکنوں نے اسے قتل کر دیا تھا۔ یہ کارکنان الاٹ کی گئی اراضی کی رات دن نگرانی کر رہے تھے۔

وزیراعلیٰ بدھ دیو بھٹہ چاریہ نے بتایا ’اس سے قبل اس معاملے کی تحقیقات کی ذمہ داری ریاستی پولیس کو دی گئی تھی لیکن اب حزبِ اختلاف کے مطالبے پر اس کیس کی تحقیقات سی بی آئی سے کرائی جائیں گی‘۔

ان کا کہنا تھا کہ اس معاملے میں جو بھی قصور وار پایا گیا اسے سزا دی جائےگی چاہے اس کا تعلق کسی بھی سیاسی جماعت سے ہو۔

ریاستی حزبِ اختلاف کی جماعت ترنمول کانگریس ٹاٹا کار فیکڑی کو زرعی اراضی الاٹ کرنے کی مخالفت کر رہی ہے اور اب پارٹی نے مبینہ حملے کے خلاف احتجاج کے طور پر جمعرات اور جمعہ کو ہڑتال کا اعلان کیا ہے۔

کمپنی کو زمین الاٹ کر نے کی وجہ سے ہم اپنی روزی روٹی کے حق سے محروم ہوگئے ہیں اور جو معاوضہ ہمیں ملا وہ بہت کم ہے سنگور کے کسانوں کا الزام

حکومت کا کہنا ہے کہ ٹاٹا کمپنی کو ارضی الاٹ کر دی گئی ہے جو جلد ہی اپنا کام شروع کردے گی۔ کمپنی کا کہنا ہے کہ وہ کم قیمت پر گاڑیوں کو سنگور میں بنائےگی جس کی قیمت صرف ایک لاکھ روپے ہوگی۔ لیکن سنگور کے کسانوں نے الزام عائد کیا ہے کہ کمپنی کو زمین الاٹ کر نے کی وجہ سے وہ اپنی روزی روٹی کے حق سے محروم ہوگئے ہیں اور جو معاوضہ انہیں ملا وہ بہت کم ہے۔

گزشتہ چالیس دنوں کے دوران پولیس اور مقامی افراد کے درمیان کئی جھڑپیں بھی ہوچکی ہیں۔