خدیجہ عارف بی بی سی اردو ڈاٹ کام، دلی

	دلتوں کا مطالبہ ہے کہ نجی تجارتی سیکٹرز میں انہیں ریزرویشن دی جائے

دلتوں کا کہنا ہے کہ نجی سیکٹرز میں انکی نمائندگی بہت کم ہے اور سماج میں ان کے ساتھ امتیازی سلوک کیا جاتا ہے۔

ریلی میں ہندوستان کی کئی ریاستوں سے ہزاروں کی تعداد میں آئے دلتوں نے حصہ لیا۔ احتجاج کرنے والوں کا مطالبہ تھا کہ حکومت نجی تجارتی سیکٹرز میں دلتوں کو ریزرویشن فراہم کرے۔

دلتوں کے رہنما اورجسٹس پارٹی کے صدر ادت راج کا کہنا ہے’ حکومت نے ڈھائی برس پہلے یہ وعدہ کیا تھا کہ وہ دلتوں کو نجی سیکٹرز میں باقاعدہ ریزرویشن دے گی لیکن اب تک حکومت نے اپنا وعدہ پورا نہیں کیا ہے‘۔

	دلتوں کا کہنا ہے کہ حکومت ان کے حالات سدھارنے میں ناکام رہی ہے

مرکزی وزیر اور لوک جن شکتی پارٹی کےرہنما رام ولاس پاسوان کا کہنا ہے وہ حکومت پر دباؤ ڈالیں گے کہ دلتوں کو نجی تجارتی سیکٹرز میں ریزرویشن دیا جائے۔

انھوں نے یہ بھی کہا ’ ہماری پارٹی اس وقت تک اپنی لڑائی جاری رکھی گي جب تک دلتوں کو نجی سیکٹرز میں ریزرویشن نہیں مل جاتی‘۔

ریلی میں حصہ لینے والے مظاہرین کا کہنا تھا کہ حال ہی میں ملک کے کئی حصوں میں دلتوں کے استحصال کے واقعات پیش آئے ہیں جس سے یہ پتہ چلتا ہے کہ سماج میں دلتوں کو آج بھی برابری کا درجہ حاصل نہیں ہے۔