خدیجہ عارف بی بی سی، دلی

	یہ ہندوستان کے لیے ایک تاریخی تبدیلی ہے: امریکی سفیر

وزیر خارجہ پرنب مکھرجی نے کہا ہے کہ ’امریکہ کے صدر جارج بش اور وزیر خارجہ کونڈولیزا رائس نے اس معاہدے کو اس مقام تک لانے میں بہت اہم کردار ادا کیا ہے۔ ’ہمیں اس بات کو یقینی بنانا ہوگا کہ دسمبر میں جب اس معاہد ے کو آخری شکل دی جائے تو ہندوستان کی ان شرائط کو مد نظر رکھا جائے جن پر گزشتہ جولائی میں وزیر اعظم منموہن سنگھ اور صدر جارج بش کے درمیان اتفاق ہوا تھا۔

ہندوستان میں امریکہ کے سفیر ڈیوڈ ملفرڈ نے ایک پریس کانفرنس کو خطاب کرتے ہوئے کہا کہ یہ معاہدہ ’ہندوستان اور امریکہ کے درمیان گہرے رشتوں کا ایک تاریخی لمحہ ہے۔‘ مسٹر ملفرڈ نے مزید کہا کہ اس معاہدے میں بعض پیچیدگیاں ہیں اور امریکہ حتمی معاہدے میں ان پیچیدگیوں سمیت اس کے تمام پہلوؤں پر غور کرے۔

یہ پوچھے جانے پر کہ کیا اس معاہدے کے بعد ہندوستان ایک نیوکلیئر طاقت بن کر ابھرے گا، مسٹر ملفرڈ نے نے کہا کہ اس معاہدے کے بعد ہندوستان ایک مضبوط عالمی طاقت بن کر سامنے آئے گا۔ اس معاہدے کے بعد ہندوستان جوہری ملکوں کی صفوں میں الگ تھلگ نہیں رہے گا بلکہ بین الاقوامی سطح پر عالمی طاقتوں کا حصہ ہوگا۔ ان کے مطابق یہ ہندوستان کے لیے ایک تاریخی تبدیلی ہے۔

ادھر حزب اختلاف کی جماعت بھارتیہ جنتا پارٹی کے سینئر رہنما ارون جیٹلی نے کہا کہ اس معاہدے کے بعد ہم حکومت سے یہ امید کرتے ہیں کہ وہ ہندوستان کے مفادات کا پورا خیال رکھے گی۔ انہوں نے مزید کہا کہ ’ہمارے ملک کا سلامتی کا نظام بہت حساس ہے اس لیے ہمیں اپنے دفاع کے لیے احتیاطی طور پر جو جوہری طاقت بچا کر رکھنے کا حق ہے اس پر کوئی سمجھوتہ نہ کیا جائے۔‘

حکمراں جماعت یو پی اے کی چیئر پرسن سونیا گاندھی نے اس معاہدے پر خوشی کا اظہار کر تے ہوئے کہا ہے کہ امریکہ کے ساتھ ہوئے بنیادی سمجھوتے سے باہر کوئی بھی شرط ہندوستان نہیں مانے گا۔