خدیجہ عارف بی بی سی اردو ڈاٹ کام

	اب بچوں سے انٹریو کے بجائے داخلے کے لیئے بعض پیمانے طے کیے گئے ہیں

عدالت کے فیصلے کے مطابق اب بچوں سے انٹریو کے بجائے داخلے کے لیئے بعض پیمانے طے کیے گئے ہیں جس میں انہیں سو پوائنٹس میں سے پوائنٹ سکور کرنے ہیں۔ داخلے کے لیئے ضابطے کے تحت ان بچوں کو ترجیح دی جائے گی جو سکول کے قریب رہتے ہیں یا پھر جن کے بہن بھائی پہلے سے اس سکول میں پڑھتے ہیں۔

ہندوستان میں چھوٹے بچوں کے نرسری سکول میں داخلے کے لیئے ابھی تک بچوں اور ان کے ماں باپ کو لمبے انٹرویو سے گزرنا پڑتا ہے۔ لیکن سکولوں کے اس نظام کے خلاف والدین کی سخت مخالفت کے بعد ہائی کورٹ نے یہ اہم فیصلہ لیا ہے جس کے تحت چھوٹے بچوں اور والدین کے انٹرویوز پر پابندی عائد کردی ئی ہے۔

دلی کے پوش لٹل ونڈرز سکول کی پرنسپل سونیا جولی کا کہنا ہے کہ عدالت کے اس فیصلے سے بچوں کو فائدہ ہوگا۔ کیونکہ چھوٹے بچے اکثر انٹریو کے وقت نروس ہوجاتے ہیں اور انہیں داخلہ نہیں مل پاتا۔ انھوں نے مزید کہا ’ہم لوگوں پر بچوں کے امتحان کی تیاری کا اتنا دباؤ رہتا تھا کہ ہم بچوں کو دوسری ایکٹویٹیز نہیں سکھا پاتے تھے۔ اب ہم ان کو آرٹ، میوزک اور دیگر چیزوں کی تعلیم دے سکے گے‘۔

کیمبریج سکول کی ٹیچر ریٹا گرور کا ماننا ہے کہ 4 برس کی عمر کے سبھی بچے ایک جیسے ہوتے ہیں اور ان کا انٹرویو کرنا حماقت ہے۔ ان کا کہنا ہے ’اگر سکول میں انٹرویو ہونگیں بھی تو آپ ایک بچے کے بارے اس چھوٹے سے انٹرویو میں کتنا جان سکیں گے۔ چھوٹے بچوں کو سکول میں بالکل فریش بھیجنا صحیح ہے تاکہ سارے بچے ایک ساتھ مل کر نئی چیزیں سیکھیں‘۔

	’سکول میں انٹرویو ختم کرنے کا عدالت کا فیصلہ صحیح ہے‘

وہیں بہت سے والدین بھی نئے سسٹم سے زیادہ خوش نہیں۔ زینب ‏سلیم کا بیٹا لٹل ونڈر سکول میں پڑھتا ہے۔ زینب کا کہنا ہے کہ نیا نظام صحیح نہیں ہے۔ ان کا کہنا ہے ’نئے اصولوں کے تحت لڑکیوں کو پانچ پوائنٹس مفت میں ملیں گے۔ میرا بیٹا ہے تو اس کا مطلب یہ ہوا کہ میرے پانچ پوائنٹ ختم ہوگئے‘۔

سویدھا داس کا ماننا ہے کہ ’مجھے اس بات سے پریشانی ہے کہ میں صرف انہیں سکولوں میں اپنے بچے کے داخلے کے فارم بھر سکتی ہوں جو میرے گھر کے قریب ہیں۔ اگر میں دور کے کسی سکول میں اپنے بچے کو داخل کرانا چاہتی ہوں تو میرے دس پوائنٹ ختم ہو جائیں گے۔ اس سے ہماری آزادی ختم ہوجاتی ہے۔ ہم اپنی پسند کے سکول میں اپنے بچے کو نہیں بھیج سکتے‘۔

بعض ماہرین کا کہنا ہے کہ ایک رہائشی کالونی میں عموما ایک سے زائد اچھے پرائیویٹ سکول نہیں ہوتے اور یہ مناسب نہیں ہے کہ ایک سکول میں ہزاروں بچوں کو داخلہ دیا جائے۔ ان کا کہنا ہے کہ عدالت کا یہ فیصلہ صرف پرائیویٹ سکولوں کے لیئے نہیں بلکہ سرکاری سکولوں پر بھی نافذ ہونا چاہیئے کیونکہ اگر حکومت چاہے تو سرکاری سکولوں کو’ نیبرہوڈ سکولوں‘ میں تبدیل کرکے زیادہ سے زیادہ بچوں کو داخلہ دے سکتی ہے۔