گزشتہ برس ڈینگو وائرس کے 11900 کیس سامنے آئے تھے

صحت کے مرکزی وزیر امبو منی رام دوس نے صحافیوں کو بتایا کہ اب تک ڈینگو وائرس سے ہندوستان بھر میں 38 اموات واقع ہوئی ہیں۔

انہوں نے بتایا ہے کہ ملک میں دو ہزار نوسو افراد ڈینگو وائرس سے متاثر ہوئے ہیں جن میں سے 673 افراد کا تعلق دلی سے ہے۔

ان کے مطابق ڈینگو سے ہونے والی 38 میں سے پندرہ اموات دارالحکومت دلی میں ہوئیں جبکہ گجرات میں تین ، راجستھان میں سات، مغربی بنگال میں تین اور کیرلا میں چار اموات ہوئی ہیں۔

ملک میں دو ہزار نوسو افراد ڈینگو وائرس سے متاثر ہوئے ہیں جن میں سے 673 افراد کا تعلق دلی سے ہے مرکزی وزیر صحت

ان کا کہنا تھا کہ ڈینگو کا علاج مشکل نہیں ہے اور کسی بھی ہسپتال میں اس کا علاج کیا جا سکتا ہے ۔ لوگوں کو نئی دہلی کے ایمز جیسے بڑے اسپتال میں جانے کی کوئی ضرورت نہیں ہے۔

صحت کے وزير نے ایک بار پھر ڈینگو کو وبائی بیماری قرار دینے سے انکار کیا ہے۔ ان کا کہنا تھا کہ دراصل یہ پورا معاملہ صفائی سے تعلق رکھتا ہے اور اکیلے حکومت کے لیئے اس سے نمٹنا مشکل ہوگا۔

گزشتہ برس پورے ملک میں ڈینگو وائرس کے گیارہ ہزار نو سو کیس سامنے آئے تھے اور اس بیماری نے 157 افراد کی جانیں لیں تھیں۔