ڈینگو بخار ایک خاص طرح کے ایڈیز نامی مچھر کے کاٹنے سے ہوتا ہے

دارلحکومت دلی کے سب سے بڑے ہسپتال آل انڈیا انسٹیٹیوٹ آف مڈيکل سائنسز میں بدھ کو ڈینگو کے کم از کم سولہ نئے مریض داخل کیئے گئے۔ سرکاری اطلاعات کے مطابق صرف دلی میں اس بخار سے پانچ سو سے زیادہ افراد متاثر ہیں اور ان میں سے ایک بڑی تعداد ہسپتال میں داخل ہے۔

حکام نے صورتحال کا جائزہ لینے کے لیئے ایک ہنگامی میٹنگ کی تاہم دلی کی حکومت نے اسے ابھی وبائی حالت قرار دینے سے گریز کیا ہے۔ صحت کے مرکزی وزیر اے رام ڈاس نے کہا ہے کہ شہریوں کو گھبرانے کی ضرورت نہیں ہے اور صورت حال رفتہ رفتہ قابو میں آرہی ہے۔

ڈینگو بخار گزشتہ کئی دنوں سے اتر پردیش ، راجستھان ، مہاراشٹر ، پنجاب اور ہریانہ جیسی ریاستوں میں پھیلا ہوا ہے اور اس سے اب تک پچیس سے زیادہ اموات ہو چکی ہیں۔ صرف دلی میں اس بخار سے چودہ لوگوں کی جانیں گئي ہیں۔

اس دوران متاثرہ ریاستوں میں اس بیماری پر قابو پانے کے لیئے ہنگامی انتظامات کئے جا رہے ہيں۔ تجزیے اور جانچ کے لیئے متعدد طبی ٹیمیں تشکیل دی گئی ہیں۔
ڈینگو بخار ایک خاص طرح کے ایڈیز نامی مچھر کے کاٹنے سے ہوتا ہے اور اس کی علامتوں میں تیز بخار، متلی ، جسم میں اینٹھن اور پیٹھ میں درد جیسی شکایات شامل ہیں۔بخار کی تیزی کی وجہ سے بعض معاملات میں دماغ کی رگ پھٹنے یعنی برین ہیمرج کا بھی خطرہ رہتا ہے۔

حکام شہریوں سے اپیل کر رہے ہيں کہ وہ اپنے گھروں کے آس پاس صفائی رکھیں اور گندا پانی جمع نہ ہونے دیں۔ کیوں کہ یہ مچھر گندے پانی میں ہی پیدا ہوتے اور پھیلتے ہیں۔