ریحانہ بستی والا بی بی سی اردو ڈاٹ کام ، ممبئی

	جاوید اختر نے کہا کہ حکومتِ پاکستان کا فیصلہ ان کے لیے ناقابل فہم ہے

جاوید اختر نے بی بی سی اردو ڈاٹ کام سے بات کرتے ہوئے کہا کہ ’انہیں یہ سن کر بہت افسوس ہوا ہے کہ حکومت پاکستان نے ان کا ویزا منسوخ کر دیاہے۔ شبانہ اعظمی ، سری دیوی ، سیف علی خان ، ارمیلا ماتونڈکر سمیت بائیس بالی وڈ کے اداکار وہاں ایک شو بھی کرنے والے تھے ۔

پاکستان ٹی وی پر ہونے والے شو سے جمع ہونے والی رقم وہاں کے زلزلہ زدگان کی مدد کے لیئے دی جانی تھی۔جاوید اختر کے مطابق حکومت پاکستان نے بیس جون کو تمام بائیس فنکاروں کو ویزا دینے کا اعلان کیا لیکن پھر یکایک بائیس جون کو وزارت خارجہ کی طرف سے یہ اعلان کیا گیا کہ اکیس افراد کا ویزا برقرار رہے گا لیکن جاوید اختر کا ویزا منسوخ کیا جا رہا ہے ۔

یہ خبر سن کر کے آصف کے بیٹے اکبر آصف نے محکمہ سے بات کی اور کہا کہ اگر جاوید صاحب کو ویزا نہیں دیا جاتا ہے تو شو منسوخ کرنا پڑے گا ۔ لیکن حکومت نے باضابطہ جب میرے ویزا منسوخ کرنے کا اعلان کر دیا تو اکبر آصف نے پاکستان میں ہونے والا پروگرام ہی منسوخ کر دیا۔

جاوید اختر حکومت پاکستان کے فیصلہ پر حیرت زدہ ہیں۔ انہوں نے کہا ’مجھے یقین نہیں آرہا ہے کہ کبھی انہیں بھی اس ملک میں آنے سے روکا جا سکتا ہے جو یہ کہتی ہے کہ انڈیا کے فنکاروں کو پاکستانی فلموں میں کام کرنے کی اجازت ہے '' ۔جاوید صاحب کا کہنا تھا کہ '' وہ ایک نیک مقصد کے تحت پاکستان جا رہے تھے ۔انہوں نے ہمیشہ دونوں ممالک میں دوستی اور بھائی چارگی کو بڑھاوا دیا ہے'' ۔
بالی وڈ نے اس خبر پر زبردست رد عمل کا اظہار کیا ہے ۔ کئی کامیاب فلموں کے ہدایت کار انیس بزمی کو اس خبر پر یقین نہیں آرہا ہے ۔ان کے خیال میں '' جاوید صاحب جیسے فنکار کو ویزا نہ دینا ایک افسوسناک امر ہے ۔حکومت پاکستان کو تو ایسے فنکاروں کا تہہ دل سے استقبال کرنا چاہئیے تھا ۔ ان حالات میں جب کہ دونوں ممالک چاہتے ہیں کہ حالات بہتر ہوں اس طرح کی کارروائی رشتوں میں دراڑ پیدا کر سکتی ہے ۔ان ممالک میں اگر آج رشتے بہتر ہوئے ہیں تو اس میں بڑا دخل فنکاروں کا ہے ۔''
پاکستان نے اس سے قبل کلاسیکی گلوکارہ شبھا مدگل کو بھی ویزا نہیں دیا تھا .چند برسوں سے انڈیا اور پاکستان میں فنکاروں کے تبادلے ہو رہے ہیں ۔ مہیش بھٹ کی فلم میں صرف میرا نے ہی اداکاری نہیں کی بلکہ ان کی فلموں میں انہوں نے گلوکار عاطف کے نغمے لئے ۔فلم گینگسٹر میں نصرت فتح علی خان کا نغمہ جیا دھڑک دھڑک جائے کافی مقبول ہوا ہے ۔اسی طرح پاکستان میں انڈیا کے فنکاروں نے کام کیا ہے ۔پاکستان کے جیو ٹی وی نے انڈیا کے فنکاروں کو لے کر کئی سیرئیل بنائے ہیں اور یہ سلسلہ جاری ہے ۔