علی گڑھ مسلم یونیورسٹی نے انڈیا کو ہر شعبے میں بہترین پروفیشنل دیئے۔

عدالت نے یہ بھی کہا ہے کہ جب تک اس معاملے سے متعلق کوئی فیصلہ نہیں آ جاتا علی گڑھ یونورسٹی کا کردار اقلیتی ادارے کا ہی رہےگا۔

اب اس معاملے کی اگلی سماعت دس مئی کو ہوگی۔

گزشتہ برس مرکزی حکومت نے ایک نوٹیفیکیشن جاری کر کے ’اے ایم یو‘ میں مسلمانوں کے لیے پچاس فیصد نشستیں مخصوص کرنے کا فیصلہ کیا تھا۔ اس فیصلے کے تحت مسلم یونیورسٹی میں پیشہ وارانہ کورسوں میں مسلمانوں کے لیے پچاس فیصد سیٹیں مخصوص کر دی گئی تھیں۔

حکومت کے اس فیصلے کے خلاف ملائے شکلا نامی ایک طالب علم نےالہ آباد ہائی کورٹ میں مفاد عامہ کی ایک درخواست دائر کی تھی جس کے نتیجے میں ہائی کورٹ کے ایک جج نے یونیورسٹی کے اقلیتی کردار کو غیر آئينی قرار دیا تھا۔

جج نے مسلمانوں کے لیئے پچاس فیصد مخصوص کرنے کو بھی کالعدم قرار دے دیا تھا۔ تاہم علی گڑھ یونیورسٹی نے الہ آباد ہائی کورٹ کے فیصلے کے خلاف سپریم کورٹ میں اپیل دائر کی تھی۔

سرسیّد احمد خان کے قائم کردہ کالج سے یونیورسٹی بننے تک مسلم یونیورسٹی نے ایک لمبا سفر طے کیا ہے اور علی گڑھ مسلم یونیورسٹی نے انڈیا کو ہر شعبے میں بہترین پروفیشنل دیئے ہیں جنہوں نے ہر جگہ اپنی شناخت بنائی ہے۔