صلاح الدین بی بی سی اردو ڈاٹ کام، دلی

	علی گڑھ مسلم یونی ورسٹی کو آئین کے تحت اقلیتی کردار حاصل ہے

حکومت نے ہائی کورٹ سے اس معاملے پر از سرنو غور کرنے کی اپیل کی تھی جس پرسماعت کے بعد یہ فیصلہ آیا ہے۔

گزشتہ اکتوبر میں الہ آباد ہائی کورٹ کے ایک جج نے اس معاملے پر سماعت کے بعد علی گڑھ مسلم یونیورسٹی میں مسلمانوں کے لیے پچاس فیصدر ریزرویشن کو غیر آئینی بتایا تھا۔ اسی پر نظر ثانی کے لیے حکومت اور اے ایم یو نے مشترکہ طور پر دوبارہ عرضی داخل کی تھی۔

مفاد عامہ کی اس عذر داردی پر سماعت ہائی کورٹ کے چیف جسٹس اے این رائے اور جسٹس اشوک بھان نے کی۔ سابقہ فیصلے کو درست ثابت کرتے ہوئے عدالت نے اپنے فیصلے میں کہا تھا کہ اقلیتی کرداراور مسلمانوں کے لیے پچاس فیصد ریزویشن کی منظوری غیر آئینی ہے۔

حکومت نے اپنی عرضی میں کہا تھا کہ عدالت نےمقننہ کے دائرہ اختیار میں بے جا مداخلت کی ہے اور علی گڑھ مسلم یونیورسٹی کو اقلیتی ادارے کا درجہ دینے کے لیے قانون میں ترمیم کی گئی تھی تاکہ اسے قانونی درجہ ملے لیکن عدالت نےاسے درست سمجھنے کے بجائے غلط قرار دے دیا۔

مرکزمیں کانگریس کی حکومت نے گزشتہ برس ایک نوٹیفیکیشن جاری کر کے اے ایم یو میں مسلمانوں کے لیے پچاس فیصد نشستیں مخصوص کرنے کا فیصلہ کیا تھا۔

اس کے تحت مسلم یونیورسٹی میں پیشہ وارانہ کورسوں میں مسلمانوں کے لیے پچاس فیصد سیٹیں مخصوص کردی گئی تھیں لیکن حکومت کے اس فیصلے کے خلاف ملائے شکلا نامی ایک طالب علم نےالہ آباد ہائی کورٹ میں مفاد عامہ کی ایک درخواست دائر کی تھی جس کے نتیجے میں ہائی کورٹ کے ایک جج ارون ٹنڈن نے اپنے اہم فیصلے میں یونی ورسٹی کے اقلیتی کردار کو غیر آئينی بتایا تھا اور اس لحاظ سے مسلمانوں کے لیے پچاس فیصد مخصوص کرنے کو بھی کالعدم
قراردیا تھا۔

علی گڑھ مسلم یونیورسٹی کی انتظامیہ اور طلباء کی انجمن یہ مطلبہ کرتی رہی ہے کہ اے ایم یو کو اقلیتی کردار دینے کے لیے پارلیمنٹ ایک بل کو منظوری دے۔