نادیہ پرویز بی بی سی اردو ڈاٹ کام، دلّی

	سردار سروور ڈیم کی تعمیر کا کام 1987 میں شروع ہوا تھا

مرکزی حکومت نے عدالت میں ایک بیان حلفی میں کہا تھا کہ وہ ڈیم کی تعمیر جاری رکھنا چاہتی ہے اور حکومت نے تجویز بھی پیش کی تھی کہ وہ متاثرہ افراد کو بسانے کے لیئے ایک جامع طریقہ اختیار کر کے ایک کمیٹی تشکیل دینا چاہتی ہے۔

مرکزی حکومت نے عدالت کو اس بات کا یقین دلایا کہ اس برس اگست کے مہینے تک آباد کاری کا کام پورا کر دیا جائے گا اور اگر اس وقت تک آباد کاری کے لیئے مستقل انتظات نہيں کیئے جا سکے تو متاثرہ افراد کے لیئے عارضی طور انتظامات کیئے جائيں گے اور مستقل رہائش کے لیئے کام جاری رہے گا۔

مرکزی حکومت کی دلیل سننے کے بعد عدالت نےکہا کہ بڑے پیمانے کے پروجیکٹس میں، جس میں ایک بڑی تعداد میں لوگ متاثرہوتے ہیں، ایک صحیح توازن بنائے رکھنے کی ضرورت ہوتی ہے۔ عدالت کا یہ بھی کہنا تھا کہ’اس معاملے کو جذباتی اور کشیدہ ماحول میں دیکھنے کے بجائے اسے ٹھنڈے دماغ سے حل کرنا چاہیئے‘۔

نرمدا بچاؤ تحریک ڈیم کی اونچائی 110 میٹر سے 112 میٹر بڑھائے جانے کے مخالفت کر رہی ہے اور اس تحریک کی جانب سے ہی ڈیم کے خلاف عدالت میں اپیل دائر کی گئی تھی۔

تحریک کے کار کنان کا کہنا ہے کہ ڈیم کی اونچائی بڑھانے سے تقریباً تین ہزار خاندان متاثر ہوں گے۔ عدالت کا کہنا ہے کہ’ سب لوگوں کو ایک ساتھ مطمئن نہيں کیا جا سکتا لیکن متاثرین کی آبادکاری کا کام صحیح طریقہ سے ہونا چاہیئے اور اس عمل میں دانشمندی اور سوجھ بوجھ سے کام لینے کی ضرورت ہے‘۔

	بھوک ہڑتالی رہنما میدھا پاٹکر

ڈیم کی اونچائی بڑھانے کے خلاف سماجی کارکن میدھا پاٹکر گزشتہ دو ہفتوں سے بھوک ہڑتال پر ہیں تاہم عدالت کے اس فیصلے سے نرمدا بچاؤ تحریک کے کارکنوں پر کافی مایوسی چھا گئی ہے۔

دوسری جانب گجرات کے وزیر اعلی نریندر مودی نے کہا ہے کہ شام سات بجے وہ اپنی بھوک ہڑتال ختم کر دیں گے۔ اتوار کی دوپہر دو بجے سے نریندر مودی نے سردار سروور ڈیم کی تعمیر کی مخالفت کرنے والوں کے خلاف احتجاجاً اکیاون گھنٹوں کی بھوک ہڑتال شروع کی تھی۔

بجلی کی پیداوار کے لیے سردار سروور ڈیم کی تعمیر کا کام 1987 میں شروع ہوا تھا اور اب تک اس منصوبے پر تقریباً تیرہ ارب روپے خرچ کیئے جا چکے ہیں۔ تاہم ڈیم کی تعمیر سے متاثر ہونے والے افراد کی آبادکاری ابھی تک پورا نہیں ہو سکا ہے اور متعدد افراد حکومت کے اقدامات کے منتظر ہيں۔