گجرات کے وزير اعلٰی نے سینکڑوں افراد کے سامنے بھوک ہڑتال ختم کی

وزیراعلٰی نریندر مودی نے کانگریس کی سربراہی میں ڈیم کی اونچائی سے متعلق حکومتی موقف کے خلاف احمد آباد میں اتوار سے بھوک ہڑتال شروع کی تھی۔

نریندر مودی نے سینکڑوں افراد کے سامنے اپنی بھوک ہڑتال ختم کرتے ہوئے کہا کہ گجرات کی تعمیر و ترقی میں وہ ہر ایک کو شامل کرنا چاہتے ہیں چاہے اس کا تعلق ’نرمدا بچاؤ اندولن‘ تنظیم سے ہو، جوکہ ڈیم کی تعمیر کی مخالفت کر رہے ہیں۔

سردار سروور کا منصوبہ بھارت کے پہلے وزیراعظم جواہر لعل نہرو نے 1950 میں شروع کیا تھا۔ تاہم یہ منصوبہ تنازعات اور اختلافات کے باعث تعطل کا شکار ہوتا رہا۔ اس سلسلے میں تازہ ترین تنازع متاثرہ افراد کی آباد کاری کا ہے۔

نرمدا ندی پر بنائے جانے والے اس ڈیم کی اونچائی بڑھانے سے مدھیا پردیش کے متاثرہ افراد کی آبادکاری کا مسئلہ مزید پیچیدہ ہو گیا ہے۔ گجرات کے کل جماعتی ارکان پارلیمان کے ایک وفد نے وزیراعظم سے درخواست کی تھی کہ ڈیم کی تعمیر کے کام میں رکاوٹ نہ آنے دی جائے۔

دلی میں نرمدا کنٹرول اتھارٹی کی نظرثانی کمیٹی میں مرکزی حکومت نے یہ تجویز پیش کی تھی کہ چونکہ آبادکاری کا کام سپریم کورٹ کے احکامات کے مطابق پورا نہیں ہوا ہے اس لیے ڈیم کی تعمیر عارضی طور پر روک دینی چاہئیے لیکن بھارتیہ جنتا پارٹی کے اقتدار والی ریاستوں گجرات راجستھان اور مدھیہ پردیش کے وزرائے اعلٰی نے اس کی سخت مخالفت کی اور کہا کہ متاثرین کی آباد کاری اور تعمیر کا کام ایک ساتھ جاری رہنا چاہئیے۔

بات چیت کے بعد آبی وسائل کے مرکزی وزیر سیف الدین سوز نے کہا تھا کہ انہوں نے وزیراعظم ایک قرارداد بھیجی ہے کہ جس میں کہا گیا ہے کہ جب تک باز آباد کاری کا کام سپریم کورٹ کے احکامات کے مطابق پورا نہیں ہوتا ڈیم کی تعمیر کا کام روک دینا چاہئیے۔

دلچسپ بات یہ ہے کہ سردار سروور ڈیم کی تعمیر کے بارے میں گجرات ميں کانگریس اور بی جے پی اکٹھے ہو گئے ہیں۔

بجلی کی پیداوار کے لیے سردار سرور ڈیم کی تعمیر کا کام 1987 میں شروع ہوا تھا اور اب تک اس منصوبے پر تقریباً تیرہ سو کروڑ روپے خرچ کیے جا چکے ہیں۔