نادیہ پرویز بی بی سی اردو ڈاٹ کام، دہلی

	بالی وڈ میں کامیابی جاصل کرنے کے بعد راج ببر 1994 سے 1999 تک راجیہ سبھا کے رکن تھے

راج ببر نے سماج وادی پارٹی کے سینیئر رہنما امر سنگھ کے خلاف سخت بیانات دیے تھے۔ انہیں اسی بیان بازی کی پاداش میں معطل کیا گیا ہے۔ اس معاملے میں آگے کی کارروائی طے کرنے کے لئے تین ممبران کی ایک کمیٹی بھی تشکیل دی گئی ہے۔

گزشتہ کئی دونوں سے راج ببر سماج وادی پارٹی کے جنرل سکریٹری امر سنگھ کے خلاف بیانات دے رہے تھے۔ راج ببر نے امر سنگھ پر الزامات عائد کرتے ہوئے کہا تھا کہ وہ پارٹی کو اس کے بنیادی نظریے سے دور لے جا رہے ہيں اور انہيں پارٹی سے فوراً برطرف کر دینا چاہیے۔

راج ببر کا یہ بھی کہنا تھا کہ ان دنوں پارٹی پر اس طرح کے سوالات اٹھائے جا رہے ہيں کہ سماج وادی پارٹی آر ایس ایس اور وی ایچ پی جیسی ہندو نظریاتی تنظمیوں کی مدد کر رہی ہے۔ ان کے مطابق اس طرح کے حالات پارٹی کے سکیولر امیج کو کمزور کر رہے ہیں۔

اپنے بیانات میں انہوں نے اس طرح کے اشارے بھی دیے ہيں کہ وہ مستقبل میں کانگریس کی طرف رخ کرنے والے ہیں۔

پارٹی کے خلاف ان بیانات کے بعد کئی اعلٰی ارکان نے راج ببر سے مستعفی ہونے کا مطالبہ کیا تھا لیکن انہوں نے خود استعفٰی دینے سے صاف انکار کر دیا تھا۔
راج ببر نے پارٹی کے فیصلہ کے رد عمل میں کہا ’مجھے پارٹی کے خلاف بیان دینے کی وجہ سے ہی معطل کیا گیا ہے جس کے لئے میں پارٹی کا شکریہ ادا کرتا ہوں‘۔

ان کا کہنا تھا ’سماج وادی پارٹی نے پارلیمانی معاملوں سے ہٹا کر سڑک پر آنے کا موقع دیا ہے اور یہ میرے لئے خوشی کی بات ہے‘۔

بالی وڈ میں کامیابی جاصل کرنے کے بعد راج ببر 1994 سے 1999 تک راجیہ سبھا کے رکن تھے لیکن 1999 میں وہ سماج داودی پارٹی کی طرف سے آگرہ سے لوک سبھا کے انتخابات میں اترے اور کامیاب ہوئے اور 2004 میں قومی انتخابات میں انہوں نے دوبارہ کامیابی حاصل کی۔