صلاح الدین بی بی سی اردو ڈاٹ کام دلی

	’ابدی سکون کا باغ‘ نامی قبرستان میں لوگ اپنے کتوں کو تمام رسم و رواج کے ساتھ دفناتے ہیں

ہندو مذہب کی مقدس کتاب گیتا کا یہ اشلوک کسی مندر کی دیوار یا فلسفیانہ کتاب کی جلد پر نہیں بلکہ ایک کتے کی قبر پر لکھا کتبہ ہے۔

دلی کے مضافات میں رجوکری نامی گاؤں میں کتوں کا ایک قبرستان ہے۔ ’ گارڈن آف ایٹرنل پیس‘ یعنی ابدی سکون کا باغ کے نام سے مشہور اس قبرستان میں لوگ اپنے کتوں کی میّتوں کو تمام رسم و رواج کے ساتھ دفناتے ہیں ۔ انکی برسی پر قبروں کی زیارت کرتے ہیں اور انکے لیے دعائیں بھی کرتے ہیں۔

گارڈن میں مجھے وجیا گھوش ملی جو اپنے کتے کے مزار پر پھول چڑھانے آئی تھیں۔ بات چیت کے دوران انہوں نے بتایا کہ کتّوں سے وہ بہت پیار کرتی ہیں۔

’میں چاہتی تھی کہ جانوروں کے دفنانے کی ایک خاص جگہ ہو تاکہ میں اپنے کتے کی آخری رسوم صحیح ھریقے سے ادا کروں۔ یہ جگہ پر سکون ہے اور میرے پیارے پالتوکو یہیں سکون مل سکتا تھا اسی لیے میں نے اسکا انتخاب کیا ہے۔‘

آج کل کتاپالناجہاں ایک فیشن ہے وہیں بہت سے لوگ دیوانگی کی حد تک انہیں چاہتے بھی ہیں۔ ایسے ہی ایک شخص مہیش گپتا نے بتایا کہ انہوں نے اپنا پہلا کتا اپنے گھر کے آنگن میں دفنایا تھا لیکن دوسرے کتّے کی موت پر انہیں کتوں کے قبرستان کی سہولت میسرہوگئی۔

انہوں نے بتایا کہ ’ گارڈن آف ایٹرنل پیس انسانوں کے قبرستان کے مانند پر سکون ہے۔ میں نے وہاں اپنا کتا دفنایا اور ایک درخت بھی لگایا ہے۔ سب سے اچھی چیز یہ ہے کہ جب چاہیں اسکی زیارت کر سکتے ہیں مزار پر پھول چڑھا سکتے ہیں۔ ایسا مقام شاید کسی دوسری جگہ کہیں نا ہو۔‘

گارڈن آف ایٹرنل پیس میں جانوروں کا ایک چھوٹا سا ہسپتال بھی ہے ۔ ڈاکٹر ونود شرماجانوروں کا علاج کرتے ہیں اوروہی اس قبرستان کی دیکھ بھال بھی کرتے ہیں۔ وہ بتاتے ہیں کہ ’ دلی میں لوگوں کے رہنے کے لیے ہی جگہ کم ہے۔ مردہ جانورتو ادھر ادھر پھینک دی جاتے ہیں۔ لیکن ہم چاہتے تھے کہ وہ بھی باقاعدہ دفنائے جائیں تاکہ انکا جسد خاکی سکون سے رہے۔ لوگ ہمارے پاس آتے ہیں وہ ہماری مدد کرتے ہیں اور ہم ان کی۔‘

	عام طور پر کتوں کےمالک اپنی مرضی کے مطابق قبر پر پتھر کا کتبہ لگا تے ہیں۔

پچھلی کئی دہائیوں میں دلی شہر کی آبادی میں تیزی سے اضافہ ہوا ہے۔ تعمیر کے لیے آئے دن زمینوں پر قبضے ہوتے رہتے ہیں۔ حال یہ ہے کہ قبرستانوں کو بچانے کے لیے حکومت نے ایک مہم شروع کر رکھی ہے۔یہاں انسان کو ایک قبر کے لیے لاکھوں روپے ادا کرنے ہوتے ہیں۔لیکن کتوں کا یہ مفت قبرستان ہرا بھرا محفوظ ہے۔

چہچہاتے پرندوں ، لہلہاتے پیڑ پودوں اور تازہ ہوا کے جھونکوں سے یہاں ایسا خوشگوار ماحول ہے کہ جیسے کوئی چمن ہو۔ ان مزاروں پر تازہ پھولوں کی چادریں اور پیار بھرے کتبوں کو دیکھ کر انسان بھی رشک کرے۔