صلاح الدین بی بی سی اردو ڈاٹ کام، دلّی

	شدت پسندوں نے فوجی کیمپ پر حملہ کیا

مرنے والوں میں تین فوجی اور دو انتہا پسند شامل ہیں۔ اس جھڑپ میں پانچ فوجی شدید زخمی بھی ہوئے ہیں۔ یہ جھڑپیں ریاست کے گرمائی دارالحکومت سری نگر میں ہول کے مقام پر ہوئی ہیں۔

سری نگر میں حکام کا کہنا ہے کہ دو شدت پسندوں نے بدھ کو بعد از دوپہر ’سی آر پی ایف‘ یعنی پیرا ملٹری سینٹرل ریزرو پولیس فورس کے ایک کیمپ پر حملہ کر دیا۔

سی آر پی ایف کے ایک افسر کے بیان کے مطابق شدت پسندوں نے کیمپ پر گرینیڈ پھینکے اور اندھا دھند گولیاں چلائیں جس سےتین جوان موقع پر ہی ہلاک ہوگئے۔ سی آر پی ایف کے ایک انسپکٹر کا کہنا تھا کہ پولیس کے جوابی حملے میں دونوں حملہ آور بھی مارے گئے ہیں۔

پولیس کے ایک سینئر افسر کے مطابق ایک شدت پسند خود کش حملے کے لیے کیمپ کے اندر گھسنے کی کوشش کر رہا تھا لیکن اسے ناکام بنا دیا گیا۔ افسر کے مطابق اس جھڑپ میں کئی جوان زخمی ہوئے لیکن حملے کو ناکام بنا دیا گیا ہے۔

ہندوستان کے زیر انتظام کشمیر میں حکام کے مطابق اگرچہ زلزلے سے سرحد پار شدت پسندوں کو بھی نقصان پہنچا ہے لیکن ان کی کاروائیوں میں کمی نہیں آئی ہے اور کشمیر میں دراندازی کے واقعات میں کمی کے باوجود یہ سلسلہ بدستور جاری ہے۔