زخمیوں میں ایک جاپانی صحافی بھی شامل ہے۔

اسی دوران شدت پسندوں نے سرینگر میں ایک سابق وزیرِ سیاحت غلام حسین میر کے جلسے میں ہینڈ گرنیڈ سے حملہ کیا جس میں دو افراد ہلاک اور پچاس کے قریب زخمی ہو گئے۔ میر اس حملے میں زخمی ہو گئے ہیں۔

حکام کا کہنا ہے کہ ایک شدت پسند کو ہلاک کر دیا ہے جبکہ ایک کو گرفتار کر لیا گیا ہے۔

اطلاعات کے مطابق ہوٹل میں ستر سویلین کو بخیر و عافیت نکال لیا گیا ہے۔

پیر کے روز سے شروع ہونے والی جھڑپوں میں ابھی تک دو فوجیوں سمیت چار لوگ ہلاک ہوئے ہیں جبکہ سات زخمی ہوئے ہیں۔ ان زخمیوں میں ایک جاپانی بھی شامل ہے۔

سرینگر میں اعلی پولیس اہلکار ایچ کے لوہیا نے بی بی سی کو بتایا ہے کہ ہوٹل میں گھیرے ہوئے ایک شدت پسند حملہ آور زخمی ہے۔

پولیس کا کہنا ہے کہ لال چوک کے علاقے میں ہونے والی اس جھڑپ میں ایک جاپانی صحافی سمیت سات عام شہری اور پولیس اہلکار زخمی بھی ہوئے۔

حکام کے مطابق یہ مسلح جھڑپ اس وقت شروع ہوئی جب شدت پسندوں نے لال چوک کے قریب واقع نیم فوجی دستے ’سی پی آر یف‘ کے بنکر پر دستی بم سے حملہ کیا۔

’ سی پی آر ایف‘ کے اعلیٰ افسر کے مطابق حملہ آور نے جائے وقوع کے قریب واقع پیک ویو ہوٹل میں پناہ لے لی ۔

ایک شدت پسندگروہ المنصورین نے لال چوک میں ہونے والے حملے کی ذمہ داری قبول کر لی ہے۔ اس گروہ کے ترجمان نے بی بی سی سری نگر کے دفتر میں فون کر کے اس واقعے کی ذمہ داری قبول کی۔ ترجمان کا کہنا تھا کہ ان کے گروہ کے چار افراد اس حملے میں شریک تھے۔