 |  ’یہ عریانیت کو ختم کرنے کی ایک کوشش ہے‘ |
بھارت کے شہر ممبئی میں کیتھولک چرچ کا کہنا ہے کہ منی سکرٹس، چست اور بڑے گلے کے کپڑے اتوار کی دعائیہ تقریب کے لیے مناسب نہیں ہیں۔ ممبئی کے آرچ بشپ نے عقیدت مندوں سے اپیل کی ہے کہ وہ دعائیہ تقریبات کے دوران مناسب لباس پہنیں۔ کلیسا کے افسران کا کہنا ہے کہ یہ عریانیت کو ختم کرنے کی ایک کوشش ہے۔ ممبئی یونیورسٹی کا ایسا ہی ایک منصوبہ بھارت کا فیشن مرکز سمجھے جانے والے اس شہر میں تنازعہ کا سبب بنا تھا۔ کارڈنل ڈائس نے روزنامہ ٹائمز آف انڈیا سے بات کرتے ہوئے کہا اتوار کی دعائیہ تقریب اب ایک طرح سے فیشن پریڈ کا موقع بن کر رہ گئی ہے۔اور ایسا لگتا ہے کہ یہ مغربی رجحان انتہا کو پہنچ گیا ہے۔ ممبئی کیتھولک فورم کے صدر ڈولفی ڈی سوزا نے بی بی سی کو بتایا کہ کلیسا نے صرف رہنما اصول جاری کئے ہیں اور انہیں حکم نہ سمجھا جائے۔ انہوں نے کہا کہ اس طرح کے رہنما اصول کوئی نئے نہیں ہیں اور کلیسا اکثر اپنے عقیدت مندوں کو اس سلسلے میں تاکید کرتا رہتا ہے۔ ہر روز چرچ جانے والے کچھ لوگوں کا کہنا ہے کہ اس طرح کی تاکید ضروری تھی کیونکہ یہ دعائیہ تقریبات ایک طرح کا فیشن شو بنتی جارہی ہیں۔ ممبئی میں تقریباً پانچ لاکھ کیتھو لک ہیں جو 100 سے زائد گرجا گھروں میں جاتے ہیں۔ حال ہی میں ممبئی یونیورسٹی کی جانب سے ڈریس کوڈ کا اقدام خاصا متنازعہ بن گیا تھا۔نیورسٹی حکام کا کہنا تھا کہ چست اور نیم عریاں لباس جرائم کو ہوا دیتے ہیں۔ کئی غیر سرکاری اور طلباء تنظیموں نے اس کی مخالفت کی تھی۔ اس تجویز کو ابھی نافذ نہیں کیا گیا۔ ماضی میں کچھ سخت گیر ہندو تنظیموں نے بھی کیمپس میں ’اشتعال انگیز‘ لباس پہنے پر پابندی لگانے کی کوشش کی تھی۔ | 
یہ صفحہ دوست کو ای میل کیجیئے
پرِنٹ کریں
