 | | | | | | | |||||||||||||||||||||||||||||||||||
| | ||||||||||||||||||||||||||||||||||||||||
|
متنازعہ رام مندر پر حملہ، چھ ہلاک | ||||||||||||||||||||||||||||||||||||||||
ایودھیا میں منہدم بابری مسجد کے مقام پر بنائے گئے عارضی رام مندر پر حملہ کرنے والے پانچوں حملہ آوروں کو نیم فوجی دستوں نے ہلاک کر دیا ہے۔ وزارت داخلہ کے مطابق پانچ حملہ آور ایک جیپ کے ذریعے متنازعہ مندر کے احاطے تک پہنچے۔ انہوں نے جیپ کو بم دھماکے سے اڑا کر دیوار میں راستہ بنایا۔ ایک شخص جیپ کے دھماکے میں بھی ہلاک ہوا ہے۔ وزیر داخلہ شوراج پاٹل نے بتایا کہ تقریباً ایک گھنٹے تک تصادم جاری رہا جس میں حملہ آور مارے گئے۔ دریں اثناء پاکستان کے دفتر خارجہ نے ایودھیا میں متنازعہ رام مندر پر حملے کی مذمت کی ہے اور کہا ہے پاکستان دہشت گردی کے خلاف ہے۔
حملے کی اطلاع ملتے ہی بھارت کے چند مقامات پر پاکستان کا پرچم نذر آتش کیا گیا۔ حیدرآباد میں بی جے پی، وشو ہندو پریشد اور دیگر تنظیموں سے تعلق رکھنے والے کارکنوں نے سڑکوں پر آ کر پاکستان کے خلاف نعرے بازی کی۔ پولیس نے بیس افراد کو ٹریفک روکنے کی کوشش پر حراست میں بھی لیا۔ تاہم حیدرآباد میں پرانے شہر میں حالات پر امن اور قابو میں تھے۔ پولیس نے شہر میں سکیورٹی سخت کر دی ہے۔ ایودھیا میں حملے کے بارے میں بھارتی وزیر داخلہ نے بتایا کہ حملہ آور اصل مندر تک نہیں پہنچ سکے تھے جو منہدم بابری مسجد کے منبر پر عارضی طور پر تعمیر کیا گیا ہے۔
متنازعہ مقام کے اطراف میں 67 ایکڑ اراضی نیم فوجی دستوں کے کنٹرول میں ہے اور وہاں سخت حفاظتی انتظامات کیے گئے ہیں۔ ان انتظامات کے باوجود حملہ آوروں کے اندر داخل ہو جانے پر حیرت ظاہر کی جا رہی ہے۔ ہلاک ہونے والے حملہ آوروں کی ابھی تک شناخت نہیں ہو پائی ہے اور نہ ہی کسی تنظيم نے ابھی تک اس حملے کی ذمے داری قبول کی ہے۔ بھارتیہ جنتا پارٹی نے اپنے پہلے ردعمل کے طور پر کل پورے ملک میں ہڑتال کی اپیل کی ہے۔ پارٹی کے صدر ایل کے اڈوانی نے کہا ہے کہ ’یہ بہت گمبھیر معاملہ ہے اور اس کا ردعمل بھی بہت گمبھیر ہو گا‘- انہوں نے مزید کہا کہ ’اس حملے سے رام مندر کے تعمیر کا معاملہ ایک بار پھر قومی اہمیت اختیار کر گیا ہے‘۔
وشو ہندو پریشد کے رہنما پروین توگڑيہ نے اس حملے کے لیے پاکستان کو ذمہ دار قرار دیا ہے جبکہ آر ایس ایس نے بھی عوام سے اس واقعہ کے خلاف احتجاج کرنے کی بات کی ہے۔ تاہم تنظیم کے ترجمان رام مادھو نے اپیل کی ہے کہ ہر حالت میں قانون کا احترام کیا جائے۔ آر ایس ایس کے صدر دفتر اور ملک کے کئی اہم مندروں کے لیے حفاظتی انتظامات مزید سخت کر دیئے گئے ہیں۔ ایودھیا اور ملک کے دیگر علاقوں میں صورت حال ابھی تک پوری طرح پر امن ہے۔ انیس سو بانوے میں ایودھیا میں بابری مسجد کے گرائے جانے کے بعد شروع ہونے والے ہنگاموں میں تقریباً دو ہزار افراد ہلاک ہو گئے تھے۔ ایودھیا سمیت پورے اترپردیش میں ہائی الرٹ کر دیا گیا ہے۔ خبر رساں ایجنسی اے پی کے مطابق ہندو قوم پرست تنظیم آر ایس ایس نے پر امن مظاہروں کی اپیل کی ہے۔ ایودھیا دنیا کے متنازعہ ترین مذہبی مقامات میں سے ایک ہے۔
| 
| ||||||||||||||||||||||||||||||||||||||||
| |||||||||||||||||||||||||||||||||||||||||
| |||||||||||||||||||||||||||||||||||||||||
یہ صفحہ دوست کو ای میل کیجیئے
پرِنٹ کریں
