شکیل اختر
بی بی سی اودو ڈاٹ کام، دلی |  |
|  مسٹر اڈوانی نے بدھ کو وزیر اعظم من موہن سے ملاقات میں انہیں اپنے دورہ پاکستان کی تفصیلات سے واقف کرایا |
گجرات کے شہر سورت میں آر ایس ایس کا انتہائی اہم اجلاس جاری ہے۔ آر ایس ایس بی جے پی کے صدر لال کرشن اڈوانی کے پاکستان میں دیے گئے بیانات سے برہم ہے اور بی جے پی کے حلقوں میں یہ قیاس آرائیاں کی جارہی ہیں کہ آر ایس ایس مسٹر اڈوانی کو لوک سبھا میں اپوزیشن کے رہنما کے عہدے سے ہٹنے کے لیے کہہ سکتی ہے۔ مسٹر اڈوانی نے اس میٹنگ کے دوران اپنے مشیر اور بی جے پی کے سکریٹری سدھیندر کلکرنی کو ان کے عہدے سے ہٹا کر آر ایس ایس کوکسی حد تک خوش کرنےکی کوشش کی ہے۔ پاکستان میں دیے گئے بیانات کے لیے مسٹر کلکرنی کو ہی ذمہ دارقرار دیا جا رہا تھا۔ دلچسپ پہلو یہ ہے کہ چند دنوں قبل مسٹر کلکرنی نے اڈاونی کو ایک خط لکھا تھا جس میں انہوں نے زور دیا تھا کہ بی جے پی کو چاہیئے کہ وہ وشو ہندو پریشد جیسی انتہا پسند تنظیموں سے تعلقات ختم کرے اور آر ایس ایس کو اپنے معاملات میں مداخلت نہ کرنے دے۔یہ خط مسٹر اڈاونی کے دفتر سے کسی نے پریس کو لیک کر دیا ۔ یہ معاملہ کلکرنی کے استعفی پر ختم ہوتا ہوا محسوس نہیں ہو رہا ۔ بی جے پی اور آر ایس ایس کے ایک سینئر رہنماء بھائی مہاویر نے قائد اعظم محمد علی جناح کو سکیولر کہے جانے پر مسٹر اڈوانی کی شدید نکتہ چینی کی تھی۔ مسٹر اڈوانی نے بھائی مہاویر سے ایک خط میں پو چھا ہے کہ ’وہ یہ بتایئں کہ اس بیان میں کیا غلط ہے اور میں نے پارٹی کے نظریے سے کہاں انحراف کیا ہے۔ ‘ اڈوانی کے اس خط سے یہ واضح ہے کہ وہ اب بھی پاکستان میں دیئے گئے اپنے بیانات پر نہ صرف قائم ہیں بلکہ اب وہ اس کا دفاع کرنے کے لیے بھی تیار ہیں۔ اس وقت بی جے پی اور آر ایس ایس دونوں میں ایک بحث جاری اور آنے والے چند دنوں میں دونوں کی نظریاتی کشمکش کے بارے میں تصویر واضح ہو سکے گی۔ | 
یہ صفحہ دوست کو ای میل کیجیئے
پرِنٹ کریں
