فردوس اے ٹک جموں

بھارت کے زیر انتظام کشمیر میں گزشتہ ہفتے ہونے والی ایک جھڑپ کی فائل تصویر

ضلع ڈوڈہ کے بھدروہ علاقے میں ہندوستانی افواج نے بدھ کی دوپہر سے ایک گھر کا محاصرہ کر رکھا ہے۔ ایک اعلی پولیس آفیسر کے مطابق جب پولیس کا ایک گروپ اس گھر کی طرف بڑھا تو مسلم تشدد پسندوں نے ان پر گولی چلائی۔ جس میں دو پولیس اہلکار مارے گئے۔ جن کا تعلق اسپیشل ٹاسک فورس سے تھا۔

مقامی باشندوں کے مطابق بھارتی افواج نے جوابی کارروائی کرتے ہوئے اس گھر میں بارود پھینک کر آگ لگا دی ۔ آگ اس قدر بڑھ گئی کہ آس پاس کے تین اور گھر بھی اس کی زد میں آگئے۔

بھارتی فوج نے کل رات ایک شدت پسند کو مارنے کا دعویٰ کیا ہے۔ محاصرہ رات بھر رہا لیکن جب صبح سی آر پی ایف کے جوان گھر کی تلاشی کے لئے آگے بڑھے تو جلے ہوئے مکان سے شدت پسندوں نے پھر گولیاں چلائيں جس میں سی آر پی ایف کے تین جوان ہلاک ہو گئے۔

ایک پولیس افسر نے بتایا کہ دو شددت پسند ہلاک ہو گئے ہیں جبکہ ایک شدت پسند اب بھی مکان کے اندر موجود ہے۔ اس بات کا بھی شک ہے کہ اس مکان میں ایک زیر زمین خفیہ کمرہ بھی ہے۔ جس کی وجہ سے شدت پسند آگ لگنے کے باوجود زندہ بچ گئے۔

اسی ضلع کے کشتواڑ علاقے میں دو دن کی مکمل ہڑتال آج ختم ہو گئی ۔ یہ ہڑتال مقامی لوگوں نے ڈویژنل کمانڈر کی مبینہ طور پر حراست میں ہلاکت کے خلاف احتجاج میں کی تھی۔