شکیل اختر
بی بی سی اردو ڈاٹ کام، دلی |  |
امریکہ کی وزیرخارجہ کونڈولیزارائس نے دلی میں اپنے ہم منصب نٹور سنگھ سے اقتصادی اور دفاعی تعاون پر مفصل بات کی ہے۔ مذاکرات کے بعد ایک نیوز کانفرنس میں محترمہ رائس نے بتایا کہ مسٹر سنگھ سے بات چیت میں ایف 16 جنگی طیارے سمیت جنگی سازو سامان کی فروخت کا معاملہ بھی زیر بحث آیا۔ انہوں نے کہا کہ ’ملٹری ٹو ملٹری رابطے اور مشترکہ مشقوں کے معاملے میں ہمارا دفاعی تعاون مستحکم ہے۔ امریکہ آئندہ برسوں میں اس تعاون اور اشتراک کو وسعت دینا چاہتا ہے۔‘ انہوں نے کہا کہ ہندوستان کی دفاعی ضروریات پر وسیع مذاکرات جاری رہیں گے اور جب وہ پاکستانی قیادت سے بات چیت کریں گی تو وہ پاکستان کی تشویش اور وہاں کی دفاعی ضروریات پر بات چیت کریں گی۔ نیوز کانفرنس سے خطاب کرتے ہوئے مسٹر نٹور سنگھ نے کہا کہ انہوں نے کنوڈولیزا رائس کو پاکستان کے ساتھ ہونے والے ’کمپوزٹ ڈائیلاگ‘ کی موجودہ صورت حال سے آگاہ کیا، جن میں بقول ان کے اطمنان بخش پیش رفت ہورہی ہے۔ ’ ہم جلد ہی یہاں جنرل پرویز مشرف کا استقبال کرنے کی راہ دیکھ رہے ہیں۔‘ امریکہ کی وزیر خارجہ نے کہا کہ نٹورسنگھ سے بات چیت میں انہوں نے ہندوستان اور پاکستان کے درمیان مذاکرات کی حمایت کا اظہار کیا اور کہا کہ اس سلسلے میں امریکہ پاکستان کے صدر اور ہندوستان کے وزیراعظم کی کوششوں کی ستائش کی نظر سے دیکھتا ہے۔ امریکی وزیر خارجہ نے کہا کہ ’یہ بہت خوشی کی بات ہے کہ ہندوستان میں حکومت بدلنے کے باؤجود امن کا یہ عمل نہ صرف جاری ہے بلکہ اور تیز ہوا ہے اور امریکہ جس طرح بھی ممکن ہو اس عمل کی حمایت کرتا ہے۔‘ ہندوستانی قیادت سے بات چیت میں افغانستان اور عراق کی صورت حال پر بھی تبادلہ خیال ہوا۔ محترمہ رائس نے مزید بتایا کہ امریکہ نے ایران ہند گیس پائپ لائن کے سلسلے میں اپنے تحفظات اور تشویش سے ہندوستان کو آگاہ کردیا ہے۔ اس کے جواب میں ہندوستان نے کہا ہے کہ ایران ان کا ایک روایتی دوست ملک ہے اور اس سے یہ توقع ہے کہ وہ نیوکلیائی معاملات میں مسلمہ بین الاقوامی اصولوں کی پابندی کریگا۔ اقوام متحدہ میں مجوزہ اصلاحات کے سلسلے میں سلامتی کونسل میں ہندوستان کی مستقل رکنیت کے دعوے کی حمایت سے متعلق ایک سوال کے جواب میں کنوڈولیزا رائس نے کہا کہ اصلاحات کی بات چیت ابھی ابتدائی مراحل میں ہے۔ | 
یہ صفحہ دوست کو ای میل کیجیئے
پرِنٹ کریں
