الطاف حسین
بی بی سی اردو ڈاٹ کام، سری نگر |  |
|  دریائے جہلم پر کمان پوسٹ کا پل جسے بس کے مسافر پیدل عبور کریں گے۔ |
دو سال پہلے انڈیا اور پاکستان کی جو فوجیں ایک دوسرے کے خلاف ہتھیار لئے اپنے بنکرز میں چوکس بیٹھی تھیں آج وہ فوجی دریائے جہلم کے اوپر لائن آف کنٹرل پر کمان پوسٹ کے اسُ پل کی تعمیر میں مصروف ہیں جو کشمیر کے دونوں حصوں کو آپس میں ملاتا ہے۔ سات اپریل کو مظفر آباد اور سری نگر کے درمیان چلنے والی بس کے مسافر کمان پوسٹ کے اسی پل کے ذریعے لائن آف کنٹرول کو پار کر کے اپنا تاریخی سفر مکمل کریں گے۔ دونوں ملکوں کے درمیان حال میں ہونے والے امن مذاکرات کے نتیجے میں اس سڑک پر پہلے لگائی گئی خاردار تار اب ہٹا دی گئی ہے۔ انڈین حکام کا کہناہے کہ اب اس علاقے میں لگائی جانے والی بارودی سرنگیں بھی مکمل طور پر ہٹا دی گئی ہیں۔
|  اووڑی کے قریب اٹھارہ کلومیٹر لمبا ایک ٹکڑا ابھی تک بری حالت میں ہے۔ |
انڈیا کے زیر انتظام کشمیر میں سرحدی علاقے اووڑی کے قریب اٹھارہ کلومیٹر لمبا سڑک کا ایک ٹکڑا اب بھی بہت بری حالت میں ہے لیکن بارڈر روڈ آرگنائزیشن کا عملہ اس کی مرمت میں دن رات مصروف ہے۔دریائے جہلم کے ساتھ ساتھ واقع یہ سڑک جو پہلے راولپنڈی روڈ کے نام سے جانی جاتی تھی، ہندوستان کی تقسیم سے پہلے جموں اور کشمیر اور باقی تمام انڈیا کے درمیان رابطے کا واحد ذریعہ تھی۔ 1947 کے بعد سے یہ سڑک استعمال میں نہیں تھی لیکن اب سات اپریل سے اس میں پھر سے جان پڑ جائے گی۔ اگرچے نئی بس سروس میں مسافر ایک ہی بس میں پورا سفر کرنے کی بجائے کمان پوسٹ پر اتر کر دریائے جہلم پر واقع پل پیدل عبور کریں گے اور دوسری بس میں سوار ہو کر آگے روانہ ہونگے، لیکن مبصرین کا کہنا ہے کہ یہ ایک اچھی ابتدا ہے۔ انڈیا کے زیر انتظام کشمیر کے وزیراعلیٰ مفتی سعید نے تیرہ مارچ کو کمان پوسٹ کے ایک دورے کے موقع پر کشمیر بس سروس کو دونوں ملکوں میں اعتماد کی بحالی کے لئے ایک بہت اہم قدم قرار دیا۔ سڑک کے ساتھ واقع سرحدی قصبوں میں بھی بس سروس کے آغازسے پہلے ہی گہما گہمی شروع ہوگئی ہے اور دکانوں کو سجایا جارہا ہے۔ تاہم سری نگر میں حکام کا کہنا ہے کہ مظفر آباد کے برعکس جہاں ہزاروں کی تعداد میں فارم جاری کئے گئے ہیں، ابھی تک انہیں جاری کردہ ڈیڑھ سو فارموں میں سے صرف تریسٹھ فارم وصول ہوئے ہیں۔ مبصرین کا خیال ہے کہ ابھی تک درخواستوں میں کمی کی وجہ یہ بھی ہوسکتی ہے کہ زیادہ تر منقسم خاندان سری نگر سے دور آباد ہیں جبکہ حکام نے فارم صرف سری نگر میں جاری کئے ہیں۔ | 
یہ صفحہ دوست کو ای میل کیجیئے
پرِنٹ کریں
