شکیل اختر بی بی سی اردو ڈاٹ کام، دلی

پولیس پروفیسر گیلانی پر قاتلانہ حملے کے معاملے میں اندھیرے میں ہے

پروفیسر گيلانی کو منگل کی رات جنوبی دلی میں ان کی وکیل نندتا ہکسر کے گھر کے باہر کسی نامعلوم حملہ آور نے گولی مار کر زخمی کر دیا تھا۔

پروفیسرگیلانی اب تھوڑی بہت بات کر لیتے ہیں اور ان کے دوستوں اور ر شتے داروں کے حوالے سے پتہ چلا ہے کہ پروفیسر گیلانی نے اپنے حملہ آور کو نہیں دیکھا تھا-

پولیس کے اندازے کے مطابق ان پر گولی تقریبا چار گز کی دوری سے چلائی گئی تھی۔

مسٹر گیلانی کی وکیل نندتا ہکسر نے کہا ہے کہ ان کے موکل کل تک کوئی بیان دینے کی حالت میں نہیں ہوں گے۔ انھوں نے اس بات پر بھی سخت اعتراض کیا کہ پولیس نے ہسپتال میں سید عبدالرحمٰن گیلانی کے کمرے کے باہر چوبیس گھنٹے پہرہ بٹھا رکھا ہے۔

اطلاعات کے مطابق ابھی تک پولیس پروفیسرگیلانی پر قاتلانہ حملے کے معاملے میں اندھیرے میں ہے لیکن پولیس پر دباؤ بڑھتا جا رہا ہے۔

گزشتہ روز بھی پروفیسرگیلانی کے حامیوں نے مظاہرہ کیا اور پولیس کے خلاف نعرے لگائے۔ اس مطالبے میں اب شدت آ رہی ہے کہ اس معاملے کی تفتیش سی بی آي سے کرائي جائے۔

حکومت کا کہنا ہے کہ وہ سی بی آئي سے تحقیقات کرانے کے خلاف نہیں ہے اور وہ ہر قدم اٹھائے گی جس کا عدالت حکم دےگی۔

گزشتہ منگل کو سپریم کورٹ نے پارلیمنٹ پر حملے کے معاملے میں دلی پولیس کی اپیل کے مقدمے کی سماعت کرتے ہوئے پروفیسر گیلانی پر ہونے والے حملے پر گہری تشویش ظاہر کی تھی اور پولیس کمشنر کو حکم دیا تھا کہ وہ ایک ہفتے کے اندر تفتیش کی مکمل رپورٹ عدالت میں پیش کرے۔