گیلانی منگل ہی کو کیس کی حتمی سماعت کے لیے عدالت گئے تھے

ابتدائی اطلاعات کے مطابق گیلانی پر پانچ فائر کیے گئے ہیں۔ انہیں آل انڈیا انسٹیٹیوٹ آف میڈیکل سائنسز میں داخل کرلیا گیا ہے۔

فائرنگ کا یہ واقعہ اس وقت پیش آیا جب وہ اپنی وکیل نندتا ہکسر سے ملاقات کرنے وسنت کنج کے علاقے میں ان کی رہائشگاہ پر گئے تھے۔

گیلانی، ذاکر حسین کالج میں بطور پروفیسر تعینات ہیں۔ منگل کی صبح وہ پارلیمان پر حملے کے کیس کی آخری سماعت کے لیے عدالت بھی گئے تھے۔

ان کی وکیلنے بتایا ’گیلانی شام کے ساڑھے آٹھ سے نو بجے کے قریب اپنے کیس کے سلسلے میں کچھ نکات جاننے کے کیے ان سے ملنے آئے تھے۔ دروازے پر زور زور سے دستک ہوئی، جب میں باہر نکلی تو گیلانی باہر تھے اور کہہ رہے تھے کہ مجھ پر فائرنگ کی گئی ہے‘۔

انہیں طبی امداد پہنچانے والے ڈاکٹروں نے ان کی حالت کے بارے میں کوئی بیان دینے سے گریز کیا ہے۔