وزیر اعظم من موہن سنگھ نے کہا کہ مزید امداد نقصانات کا تخمینہ لگانے کے بعد مہیا کی جائے گی

ہفتے کو متاثرہ جزائر کا دورہ کرنے کے بعد بھارتی وزیر اعظم نے ایک پریس کانفرنس میں کہا کہ سائنسدانوں کی ایک کمیٹی بھی بنائی جا رہی ہے جو خطے میں رونما ہونے والے سمندری اور جغرافیائی تغیرات کا جائز لے کر سفارشات مرتب کر ئے گی جن کی روشنی میں جزائر کی آبادی کو محفوظ مقامات پر منتقل کرنے پر غور کیا جائے گا۔

من موہن سنگھ نے کہا کہ متاثرہ علاقوں میں امدادی کاموں کے لیے سرِ دست غیر ملکی امدادی اداروں کی ضرورت نہیں ہے لیکن اگر متاثرہ افراد کی بحالی کے لیے ان کی ضرورت پڑی تو ان کو دعوت دی جائے گی۔

من موہن سنگھ نے متاثرہ علاقوں کے دورے کے دوران ریلیف کیمپوں کا دورہ کیا اور متاثرہ افراد سے ملاقات کی۔

وزیر اعظم نے کہا کہ چار کروڑ ڈالر کی امدادی رقم ہنگامی بنیادوں پر جزائر کی انتظامیہ کو فراہم کر دی جائے گی۔

انہوں نے کہا کہ جزائر میں ہونے والے نقصان کا صحیح تخمینہ لگانے کے بعد مزید امدادی رقم فراہم کر دی جائے گی۔

انہوں نے کہا متاثرہ افراد کی امداد کے لیے ہر ممکن اقدامات کیے جائیں گے۔ جزائر میں سکولوں کے امتحانات کو ملتوی کر دیا گیا ہے اور متاثرہ علاقوں میں کسانوں کو متبادل زمین فراہم کی جارہی ہیں۔

بیرونی امداد کے بارے میں ایک سوال کے جواب میں انہوں نے کہا کہ بھارت نے متاثرہ افراد کی امداد ی ضروریات پہلے مرحلے میں اپنے وسائل سے پوری کر لی ہیں۔ تاہم انہوں نے عالمی بینک اور بین الاقوامی مالیاتی ادارے سے امدا قبول کرنے کی امکان کو رد نہیں کیا۔