 |  شنکر اچاریہ کی گرفتاری پر بھارت میں بھرپور احتجاج کیا گیا تھا۔ |
جنوبی بھارت کی پولیس نے ریاست تامل ناڈو کے ایک مندر سے تعلق رکھنے والے شخص کے قتل کے اہم ملزمان میں سے ایک کو گرفتار کر لیا ہے۔ اطلاعات کے مطابق کرشنا سوامی نامی اس شخص کو پولیس نے ریاست آندھرا پردیش میں واقع اس کے گھر سے گرفتار کیا۔ کرشنا سوامی المعروف اپّو کو تامل ناڈو منتقل کیے جانے کی امید ہے جہاں پیر کو اس مقدمے کی کارروائی ہو گی۔ بھارت کے ایک اہم مذہبی رہنما شنکر اچاریہ جیئیندر سرسوتی بھی اس مقدمے کے سلسلے میں پولیس تحویل میں ہیں۔ان پر قتل ، سازش اور ثبوت مٹانے کے الزامات لگائے گئے ہیں۔ شنکر رمن نامی مقتول کے بارے میں کہا جاتا ہے کہ وہ شنکر اچاریہ کے بارے میں گمنام خطوط لکھا کرتا تھا۔ ان خطوط میں شنکر اچاریہ جیئیندر سرسوتی پر الزامات لگائے گئے تھے کہ انہوں نے نہ صرف مندر کی رتھ کی تیاری کے لیے موجود سونا خرد برد کر لیا بلکہ اپنے رشتہ داروں کو مندر کی رقوم سے عالیشان طرزِ زندگی فراہم کیا۔ جیئیندر سرسوتی بھارت میں ہندو مت کے پانچ اہم ترین رہنماؤں میں سے ایک ہیں۔ بھارت کے وزیرِاعظم منموہن سنگھ نے پولیس اور عدالت سے کہا ہے کہ وہ اس مقدمے کی حساسیت کا اندازہ کریں۔ شنکر اچاریہ کی گرفتاری نے ان کے معتقدین کو مشتعل کر دیا تھا اور اس کے نتیجے میں ملک بھر میں مظاہرے ہوئے تھے جبکہ کچھ افراد نے بھوک ہڑتال بھی کی تھی۔ بھارتی حزبِ اختلاف کی اہم ترین رکن بھارتیہ جنتا پارٹی نے مطالبہ کیا ہے کہ اس مقدمے کی کارروائی ریاست تامل ناڈو سے باہر کی جائے تاکہ انصاف کا حصول ممکن ہو سکے۔
| 
یہ صفحہ دوست کو ای میل کیجیئے
پرِنٹ کریں
