شکیل اختر بی بی سی اردو ڈاٹ کام، نئی دہلی

شنکرآچاریہ پر قتل کا الزام ہے

ہڑتال کا ابھی تک کوئی خاص اثر نہیں ہوا ہے۔ ممبئی میں بعض ہندو کارکنوں کو نقص امن کے اندیشے کے تحت گرفتار کیا گیا ہے۔گوالیار سے بھی معمولی پتھراؤ کی اطلاعات ہیں۔

دارالحکومت نئی دہلی میں ہندوقوم پرست جماعت بھارتیہ جنتا پارٹی کا احتجاجی دھرنا جاری ہے۔ سابق وزیر خارجہ جسونت سنگھ کی قیادت میں بی جے پی کے کئی رہنما ؤں نے برت (فاقہ) رکھا۔ سابق وزیر اعظم چندرشیکھر بھی اتحاد کے اظہار کے لۓ پارلمینٹ کے نزدیک دھرنے کے مقام پر پہنچے۔

ہڑتال کے دوران ہندو مذہبی رہنماؤں، سرکردہ سنتوں اور سادھوؤں کے ایک وفدنے صدر جمہوریہ اے پی جے عبدالکلام سے ملاقات کی اور ان سے درخواست کی کہ وہ شنکرآچاریہ کی رہائی کے لۓ مداخلت کريں۔

ادھر کانچی پورم کی ایک عدالت نے شنکرآچاریہ کی پولیس میں تحویل کی مدت میں تو سیع کی ایک درخواست نامنظور کر دی۔ پوچھ گچھ کے لۓ انہیں 19 نومبر کو چار دن کے لۓ پولیس کی تحویل میں دیا گیا تھا جو اب ختم ہو گئی ہے۔انہیں ایک ایسے پولیس اسٹیشن کے لاک اپ میں رکھا گیا ہے جس کے سارے کام کاج کی ذمہداری خاتون پولیس افسروں کے ہاتھ میں ہے۔

پولیس تحویل ختم ہوتے ہی شنکرآچاریہ کوجیوڈیشیئل کسٹڈی کے تحت دوبارہ جیل بھیج دیاگیا ہے۔ تامل ناڈو کے ہائی کورٹ نے کہا ہے کہ ہندو مذہبی رہنما سے پوچھ گچھ کے وقت ان کا ایک وکیل وہاں کچھ دور پر موجود رہ سکتا ہے لیکن وہ پوچھ گچھ کے عمل میں کسی طرح کی مداخلت نہیں کر سکتا۔

بی جے پی کے صدر لال کرشن اڈوانی مدراس میں ہیں اور وہ شام کو شنکرآچاریہ سے ملاقات کرنے کی کوشش کریں گے۔ اس دوران تامل ناڈو کی وزیراعلی جیہ للیتا نے کانچی مندر کے مقتول کارکن شنکر رمن کی اہلیہ اور بچوں کے لۓ پانچ لاکھ روپۓ کی امداد کا اعلان کیا ہے۔

شنکر رمن کے شنکرآچاریہ سے تعلقات اچھے نہیں تھے۔ ستمبر کے اوائل میں شنکر رمن نے ایک خط لکھ کر شنکرآچاریہ کو متنبہ کیا تھا کہ اگر انہوں نے اپنی روشنہیں بدلی تو وہ کانچی پورم مٹھ کی مبینہ بدانتظامیوں اور بدعنوانیوں کا پردہ فاش کر دیں گے۔ رمن کو اس خط کے چند دن بعد ہی قتل کردیا گیا تھا۔